Համացանցում, այդ թվում՝ որոշ լրատվամիջոցների ակտիվ ջանքերով, շրջանառվում է այն թեզը, թե Երևան համայնքը պատրաստվում է արգելել միջմարզային ուղևորափոխադրողներին մտնել Երևան քաղաք։ «Հապացույց» այդ պնդման՝ Երևանի փոխքաղաքապետ Սուրեն Գրիգորյանը բերում է իր և մի քաղաքացու անձնական նամակագրություն (ձայնային հաղորդագրության տեսքով)։
Սուրեն Գրիգորյանի փոխանցմամբ՝ այդ հաղորդագրության մեջ բովանդակային առումով նշվում է հետևյալը.
«Ինչ վերաբերում է մարզային ուղևորափոխադրողներին, ապա այստեղ մեկ այլ գլոբալ խնդիր ունենք, քանի որ այսօր այդ ուղևորափոխադրողները ուղևորներին հասցնում են մինչև Երևանի կենտրոնական հատվածներ, ինչն այդքան էլ ճիշտ մոտեցում չէ։ Ճիշտ մոտեցումն այն է, որ միջմարզային ուղևորափոխադրում իրականացնող տրանսպորտը պետք է կանգնի ավտոկայանում, որտեղից ուղևորն արդեն օգտվի Երևանի ներքաղաքային տրանսպորտից»։
Նրա խոսքերով՝ որոշ անձինք և լրատվականներ իր այս խոսքերին տալիս են առաջին պարբերության մեջ նշված գնահատականը, կառուցում վերլուծություններ, թե դա արվում է, որ լրացուցիչ բեռ դրվի քաղաքացիների ուսերին։
«Հարգելինե՛րս, թերևս ցավոք սրտի ձեր համար, ձեր բանավեճն այս հարցով ինձ հետ չէ, քանի որ ես չեմ այդ մտքի հեղինակը։ Առաջարկում եմ ծանոթանալ WYG կազմակերպության զեկույցին, որից համապատասխան հատվածը տեղադրում եմ ստորև։
Գուցե ավելորդ է, բայց նշեմ, որ այս զեկույցը պատրաստվել է շատ ավելի վաղ, քան ես որևէ պաշտոն եմ ստանձնել քաղաքապետարանում, և ես չէի, որ բոլորովին վերջերս, հեռուստաբանավեճի ժամանակ, այդ զեկույցին անդադար հղում էի անում՝ որպես ճշմարտության անքննելի աղբյուրի»,- գրել է Գրիգորյանը։
