Իսրայելի պաշտպանության բանակը (ԻՊԲ) հայտնել է Գազայի հատվածից հրեական պետության տարածքի նոր գնդակոծության մասին, ԻՊԲ մամուլի ծառայությունից հայտնել են, որ հունվարի 16-ի առավոտյան Նիր Ամ բնակավայրի շրջանում օդային տագնապի շչակների գործելուց հետո Գազայի հատվածի հետ սահմանի մոտ հայտնաբերվել է արկ, որը պայթել է անմարդաբնակ տեղանքում։
«Մանրամասներն ուսումնասիրվում են», - ասված է հաղորդագրության մեջ: Իր հերթին Իսրայելի վարչապետ Բենիամին Նեթանյահուի գրասենյակը հայտնել է, որ պաղեստինյան ՀԱՄԱՍ արմատական շարժումը հրաժարվում է ձեռք բերված համաձայնություններից՝ ստեղծելով ճգնաժամ վերջին պահին, որը խոչընդոտում է Գազայի հատվածի շուրջ համաձայնության ձեռքբերմանը։ Գրասենյակում նշել են, որ ՀԱՄԱՍ շարժումը «հրաժարվում է հստակ պայմանավորվածություններից, որոնք համաձայնեցվել են միջնորդների և Իսրայելի հետ՝ փորձելով ճնշում գործադրել վերջին պահին»։
Մինչդեռ պաղեստինյան ՀԱՄԱՍ շարժման պաշտոնական ներկայացուցիչ Իզզաթ ար Ռիշքը հայտարարել է, որ կազմակերպությունը կատարում է Գազայի հատվածում հրադադարի շուրջ համաձայնագրի պայմանները։«ՀԱՄԱՍ-ը հավատարիմ է մնում հրադադարի համաձայնագրին, որի մասին հայտարարել են միջնորդները», - գրել է ար Ռիշքն իր Telegram ալիքում:
Ավելի վաղ Գազայի հատվածի Քաղաքացիական պաշտպանության գործակալությունը հայտնել էր, որ հրադադարի համաձայնության հասնելու մասին հայտարարությունից հետո, հունվարի 16-ի գիշերը իսրայելական ավիահարվածների հետևանքով Գազայում ավելի քան 20 մարդ է զոհվել։
Հրադադարի համաձայնագիրը պետք է ուժի մեջ մտնի հունվարի 19-ին։ Այն ընդգրկելու է 3 փուլ. առաջին փուլի ընթացքում պետք է լինի լիարժեք հրադադար, իսրայելական ուժերը պետք է դուրս գան Գազայի բնակելի հատվածներից, ՀԱՄԱՍ-ը պետք է ազատ արձակի իր մոտ պահվող 33 պատանդի՝ իսրայելական բանտերում գտնվող տասնյակ պաղեստինցիների դիմաց։ Երկրորդ փուլի ընթացքում պետք է լինի պատերազմի լիարժեք դադարեցում, պետք է պաղեստինցի բանտարկյալների հետ փոխանակվեն ողջ մնացած մյուս պատանդները, իսրայելական ուժերը պետք է դուրս գան Գազայի հատվածից, իսկ ժամանակավոր հրադադարը պետք է դառնա մշտական։Երրորդ փուլի ընթացքում պետք է ներկայացվի Գազայում խոշոր վերակառուցում իրականացնելու պլանը, զոհված պատանդների մարմինները պետք է վերադարձվեն իրենց ընտանիքներին։
