ԱԺ նախկին պատգամավոր Անահիտ Բախշյանը ֆեյսբուքի իր էջում գրել է.
«ՀՀ քննչական կոմիտեի նախագահ հարգելի պարոն Արթուր Պողոսյան
Դուք 2024 թվականի նոյեմբերի 28-ին ՀՀ կառավարության որոշմամբ նշանակվել եք ՀՀ քննչական կոմիտեի նախագահ, 2022-2024թթ. եղել եք ՀՀ զինվորական դատախազի տեղակալ, ապա` ՀՀ գլխավոր դատախազի տեղակալ, 2020-2022 թթ ՀՀ ազգային անվտանգության ծառայության քննչական դեպարտամենտի պետ, այսինքն պետք է, որ տեղյակ լինեք 2019թ. դեկտեմբերի 25-ին իմ դիմումի համաձայն ՀՀ գլխավոր դատախազի որոշմամբ հոկտեմբերի 27-ի դատավարության անջատված մասի վերաբացված գործի ընթացքից թե՛ ԱԱԾ-ում, թե՛ 2024թ. փետրվարից ՀՀ քննչականում:
Ի՞նչ է արել Ձեր կառույցը հոկտեմբերի 27-ի ահաբեկչության պատվիրատուների, կազմակերպիչների ու հրահրողների վերաբացված գործը բացահայտելու ուղղությամբ: Պարզվում է՝ ոչի՛նչ, որովհետև այսօր նույնպես վտանգված եմ տեսնում մեր պետության անվտանգությունը և դրա սկիզբը դրվեց 1999թ. հոկտեմբերի 27-ին:
2024թ նոյեմբերի 11-ին նամակով դիմել եմ ՀՀ գլխավոր դատախազին, ՀՀ քննչական կոմիտեի նախագահին, ՀՀ արտաքին հետախուզության ծառայության պետին և նոյեմբերի 19-ին ՀՀ գլխավոր դատախազությունից ստացել եմ այս պատասխանը:
ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության պետի տեղակալ պարոն Լևոն Թաթոսյան, կբարեհաճե՞ք պատասխանել՝ քննարկե՞լ եք արդյոք իմ դիմումը և ե՞րբ եք ՀՀ դատախազությանը զեկուցելու Ձեզ տրված հանձնարարականի ընթացքի մասին: Հետաքրքիր է, թե ՀՀ գլխավոր դատախազությունը հետևու՞մ է իր տված գրավոր հանձնարարականներին ու ինչպե՞ս է հետևում: Ես, որպես դիմումատու ՀՀ քաղաքացի, փաստում եմ, որ չի հետևում, քանի որ ՀՀ Օրենքով քաղաքացու դիմումին պետք է պատասխանվի 1 ամսվա ընթացքում:
Սպասում եմ»։
