Երեկ՝ հունվարի 13-ին, ՀՀ քննչական կոմիտեի Արարատի մարզային քննչական վարչության հատկապես կարևոր գործերով ավագ քննիչ Արսեն Սարգսյանի որոշմամբ նախաձեռնվել է քրեական վարույթ՝ ՀՀ Քր. օր.-ի 342-րդ հոդվածի 2-րդ մասի հատկանիշներով (Ճանապարհատրանսպորտային պատահար, որն առաջացրել է մահ):Ինչպես հայտնում է ֆոտոլրագրող Գագիկ Շամշյանը, նշված քրեական վարույթը նախաձեռնվել է երեկ Արարատի մարզում տեղի ունեցած ողբերգական ավտովթարի փաստով, ինչի հետևանքով Երևան-Երասխ-Մեղրի ավտոճանապարհի Տիգրանաշենի ոլորանների ձորում հայտնաբերվել էր «Hyundai Accord» մակնիշի ավտոմեքենան, որի վարորդին՝ ՀՀ Ազգային ժողովի պատգամավոր, «Հայաստան» խմբակցության անդամ Մհեր Սահակյանի մարմինը Վեդիի հրշեջ-փրկարարական ջոկատի փրկարարները՝ ջոկատի հրամանատարի գլխավորությամբ, դուրս էին բերել մեծ դժվարությամբ, օգտագործելով հատուկ տեխնիկա և մարմինը մոտ 700 մետր ոտքով անանցանելի ճանապարհով մոտեցրել էին դիատարին:
Ֆոտոլրագրողի տեղեկություններով՝ քննիչի որոշմամբ նշանակվել է դիակի դատաբժշկական և ավտոտեխնիկական փորձաքննություն, պարզելու համար՝ արդյոք ավտոմեքենան տեխնիկական անսարքություններ ունեցել է, թե ոչ: Ըստ նախնական տեղեկությունների՝ վթարի հիմնական պատճառներից մեկը եղանակային անբարենպաստ պայմաններն են եղել՝ մառախուղը:
