Ադրբեջանը բողոքի նոտա է հղել Էրիթրեային՝ կապված Ադրբեջանի դրոշի ներքո նավարկվող երեք նավի կալանման հետ, հայտնել է երկրի ԱԳՆ պաշտոնական ներկայացուցիչ Այխան Հաջիզադեն։
Նա ընդգծել է, որ անցյալ տարվա նոյեմբերի 7-ին «CMS Pahlavan», «CMS Igid» և «CMS-3» նավերը, որոնք շահագործվում են «Caspian Marine Services B.V.» ընկերության ադրբեջանական մասնաճյուղի կողմից և կրում են Ադրբեջանի պետական դրոշ, Սուեզի ջրանցքից ուղևորվելով ԱՄԷ-ի ուղղությամբ, եղանակային պայմանների վատթարացման պատճառով ստիպված են եղել մտնել Էրիթրեայի տարածքային ջրեր։
«Չնայած այն հանգամանքին, որ նավերի անցման ժամանակ նախապես կապ է հաստատվել Էրիթրեայի նավահանգստային իշխանությունների հետ, տեղեկություն փոխանցել չի հաջողվել: Այն բանից հետո, երբ նավերը մտել են տարածքային ջրեր, Էրիթրեան հայտարարել է, որ նավերի մուտքն անօրինական է, և նրանք կալանվել են: Նավերի անձնակազմի 18 անդամները Ադրբեջանի քաղաքացիներ են»,- նշել է Հաջիզադեն։
