Euromedia24.com-ը գնացել է մամուլում հրապարակված նյութի հետքով, ըստ որի Նոյեմբերյանի պետական քոլեջի դասասենյակները տաքացվում են ժանգոտած փայտե վառարանների ու ծակ խողովակների միջոցով։ Մեր լրատվական խումբը փորձեց հասկանալ, թե 21-րդ դարում ինչու են դասասենյակները տաքացվում փայտի վառարաններով , ուստի կապ հաստատեցինք Նոյեմբերյանի պետական քոլեջի տնօրեն Կարեն Նազարյանի հետ։ Վերջինս Euromedia24-ի հետ զրույցում անդրադարձել է քոլեջում գործող ջեռուցման համակարգին և առաջիկա փոփոխություններին։
Կարեն Նազարյանի խոսքով՝ ներկայումս քոլեջի մի մասը տաքացվում է հոսանքով, իսկ մյուս մասը ՝ փայտի վառարաններով, իսկ դասախոսները ու ուսանողները չեն դժգոհում․ «Մեծ ծախսեր անելու անհրաժեշտություն չկա՝ հաշվի առնելով, որ 2025 թվականին քոլեջը պետք է ամբողջովին հիմնանորոգվի։ Թյուր է այն կարծիքը, թե դասասենյակները տաքացնող վառարանները հին են և ծակ խողովակներով, քանի որ ամեն տարի վառարանները թարմացվում են։ Քոլեջում դասասենյակները միշտ էլ այսպես են տաքացվել, և երբեք խնդիրներ չեն եղել։ Հիմա քոլեջում տեղադրված են արևային էներգիայի կայաններ՝ 46 կվտ հզորությամբ 3 կայաններ։ Իսկ հաջորդ տարվանից արդեն բոլոր դասասենյակններն են տաքացվելու հոսանքով»,- նշեց քոլեջի տնօրենը։
Տնօրենը ընդգծեց, որ քոլեջի շենքը հին և տիպային է և,բնականաբար, այդ պայմաններով էլ պետք է տաքացվեին դասասենյակները։ Ըստ նրա, քոլեջը հիմա էներգետիկապես անկախ է, սակայն մոտ ապագայում բոլոր դասասենյակները կաշխատեն միայն հոսանքով։ Մնում է հուսալ, որ հաջորդ ուսումնական տարում ուսանողները կհաճախեն հաստատություն՝ ավելի բարեկեցիկ պայմաններով և ջեռուցված շենքում։
