Վարչապետ Նիկոլ Փաշինյանը Կառավարության նիստի ժամանակ անդրադարձավ հանրության շրջանում աշխատավարձի՝ «մաքուր» և «կեղտոտ» ձևակերպումներին։
Ըստ նրա՝ առօրյա կյանքում մարդիկ այդպես են խոսում և նույնիսկ չեն ֆիքսում՝ ինչ են ասում։
«Եկե՛ք սա վերլուծենք էլի: Կեղտոտը գիտե՞ք որն է, որ հարկը մեջն է:
Այսինքն, ստանում ենք մենք 500 հազար դրամ աշխատավարձ, դրանից 20 տոկոսը եկամտահարկ պետք է վճարվի: Հետո այստեղից հարկ վճարելու նկատմամբ վերաբերմունք է ձևավորվում: Հենց այս 500 հազարը 2 մասի բաժանածը ճշգրիտ ցույց է տալիս այն հայեցակարգը, որ պետական բյուջեն մեր ընտանեկան բյուջեի մասն է»,- ասաց Փաշինյանը:
Ըստ Փաշինյանի՝ քանի դեռ մենք այդ աշխատավարձին ասում ենք՝ մաքո՞ւրն է այդքան, թե՞ կեղտոտը, դա արտահայտում է մեր մտածողությունը, մեր սոցիալ-հոգեբանությունը:
«Սա էլ է պետության և ապապետության արանքում: Ո՞նց կարող ես դու քո պետությանը, քո կարիքի համար քո մասհանումը նման վերնագրի ներքո ներկայացնես և նման բառապաշարով ներկայացնես, բայց մենք սա անում ենք:
Ես սա ցանկացա բարձրաձայնել, որ այս խնդիրները գույքագրենք, որպես մեր օրակագրի հարց, որոնց պետք է անդրադառնանք: Եթե մենք այս տողատակերին չանդրադառնանք, մեր կյանքում բան չի փոխվելու»,-ասաց վարչապետը:
