Վրաստանի խորհրդարանի նախագահը ստորագրել է օտարերկրյա գործակալների մասին օրենքը

Վրաստանի խորհրդարանի նախագահ Շալվա Պապուաշվիլին ստորագրել է օտարերկրյա գործակալների մասին օրենքի ռուսական անալոգը՝ «Օտարերկրյա ազդեցության թափանցիկության մասին» օրինագիծը, այն բանից հետո, երբ Վրաստանի նախագահ Սալոմե Զուրաբիշվիլին, ինչպես եւ սպասվում էր, հրաժարվել էր ստորագրել փաստաթուղթը, տեղեկացրել է SOVA-ն։«Այսօր ես ստորագրեցի «Օտարերկրյա ազդեցության թափանցիկության մասին» օրենքը։ Օրենքի հիմնական նպատակը Վրաստանի քաղաքական, տնտեսական եւ սոցիալական համակարգերի կայունության ամրապնդումն է արտաքին միջամտության հանդեպ։ Ինչ վերաբերում է արարողակարգերին. այսօր ես այն ստորագրեցի, կհրապարակվի  «Օրենսդրական տեղեկատուում», վաղվանից կհամարվի հրապարակված, եւ վաղվանից 60 օրվա ընթացքում արդարադատության նախարարությունը կմշակի ենթաօրենսդրական նորմատիվային բոլոր ակտերը, ինչպես նաեւ կստեղծի էլեկտրոնային պորտալ կազմակերպությունների համար։60 օր հետո բոլոր կազմակերպությունները, որոնք զգալի արտասահմանյան ֆինանսավորում ունեն, պետք է գրանցվեն այդ պորտալում։ Օրենքը ուժի մեջ կմտնի վաղվանից (2024թ. հունիսի 4-ից- խմբ.), բայց նրանք պարտավոր են գրանցվել 60 օր հետո՝ սկսած վաղվանից, այսինքն՝ մոտավորապես սեպտեմբերի 4-5-ին»,- ասել է Պապուաշվիլին ճեպազրույցում։Մայիսի 18-ին պետության ղեկավարը վետո էր դրել օրինագծի վրա, որն ընդունել էին 84 պատգամավորներ երրորդ ընթերցմամբ, վետո, որը նրանք էլ հաղթահարեցին 2024թ. մայիսի 28-ին։Արեւմուտքում խորհրդարանականների քայլը քննադատության ալիք առաջացրեց. Գերմանիայի դեսպան Փետեր Ֆիշերը անգամ հայտարարեց, որ քանի դեռ Վրաստանում կգործի այդ օրենքը, ԵՄ մտնելու վերաբերյալ բանակցություններ երկրի հետ չեն սկսվի։ԱՄՆ պետդեպարտամենտի կայքում 2024թ. մայիսի 24-ի գիշերը տեղեկություն հայտնվեց այն մասին, որ Վաշինգտոնը կվերանայի Վրաստանի հետ համագործակցության բոլոր ոլորտները։ Հայտարարությունում ասված էր նաեւ վիզային սահմանափակումներ մտցնելու մասին նախկին եւ գործող քաղաքական գործիչների (ինչպես նաեւ նրանց ընտանիքների անդամների) համար, որոնք մասնակցել են օրենքի ընդունմանը։ Պատժամիջոցները ուղղվելու են նաեւ ուժայինների դեմ, որոնք մասնակցել են խաղաղ ցույցերի ցրմանը Թբիլիսիում։Իսկ ԱՄՆ պատժամիջոցային քաղաքականության համակարգող Ջիմ Օ՛Բրայենը հայտնել է, որ Վրաստանի կառավարող ուժը «ստիպված կլինի խաղալ այն ակումբի կանոններով, որտեղ փորձում է մտնել»։«Վրացական երազանքի» քաղխորհուրդը պատասխանել է ԱՄՆ պետդեպարտամենտի վիզային սահմանափակումների որոշմանը. իշխանության կուսակցությունում Վաշինգտոնի մտադրություններն անվանել են «հակաարդյունավետ» եւ «աննախադեպ»։Մոսկվայում այս ֆոնին հնչում են աջակցության խոսքեր Վրաստանի ներկա իշխանությունների «հետեւողական դիրքորոշման» վերաբերյալ, ընդգծվում են Արեւմուտքի «երկակի չափորոշիչները» երկրի հանդեպ։