Ռուսաստանի Դաշնությունը հետևում է Հայաստանի եւ Ադրբեջանի միջև սահմանազատման գործընթացին, և այն կարևոր նշանակություն ունի տարածաշրջանում կայունության հաստատման համար։ «Արմենպրես»-ի թղթակցի հաղորդմամբ՝ այս մասին ամենշաբաթյա մամուլի ասուլիսի ժամանակ հայտարարել է Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան։ «Մենք սատարում ենք կարգավորմանն ուղղված բոլոր գործընթացներին՝ բացառապես դիվանագիտական մեթոդներով և ելնում ենք այն հանգամանքից, որ պայմանավորվածությունները պետք է կրեն հետևողական, հավասարակշռված և փոխշահավետ բնույթ՝ հիմք հանդիսանալով տարածաշրջանում ամուր խաղաղության հաստատման համար։ Մենք հաստատում ենք մեր պատրաստակամությունը՝ սահմանազատման գործընթացում ունենալու խորհրդատվական ազդեցություն՝ հիմք ընդունելով Ռուսաստանի, Հայաստանի և Ադրբեջանի առաջնորդների միջև ձեռք բերված եռակողմ պայմանավորվածությունը»,- իր խոսքում նշել է Մարիա Զախարովան։ Անդրադառնալով «Տավուշը հանուն հայրենիքի» շարժման մասնակիցների կողմից անցկացվող բողոքի ակցիաներին՝ ՌԴ ԱԳՆ պաշտոնական ներկայացուցիչը նշել է, որ ՌԴ-ն այդ գործընթացները դիտարկում է որպես ՀՀ ներքին գործ։Զախարովան ընդգծել է, որ Ռուսաստանը տրամադրված է հայ ժողովրդի հետ այն նույն բարեկամական լիարժեք հարաբերությունների շարունակմանը, որոնք դրսևորվում են հենց այն պահին, երբ եղբայրական ժողովուրդը զգում է դրա կարիքը։
Հայաստանի և Ադրբեջանի միջև սահմանազատման գործընթացը կարևոր նշանակություն ունի տարածաշրջանում կայունության հաստատման համար․ Զախարովա
30.05.2024 18:42 |
Կատեգորիա
Ռուսաստան
