Իրանի աջակցությունը վայելող հութիները վերջին օրերին լայնածավալ հարձակում են իրականացրել Եմենի արևմուտքում՝ վերահսկողություն հաստատելով մոտ 2,6 հազար քառակուսի կիլոմետր տարածքի նկատմամբ։ Հնգօրյա մարտերի ընթացքում նրանք գրավել են Կարմիր ծովի ափին գտնվող Մոխա նավահանգստային քաղաքը, որը գտնվում է ռազմավարական նշանակություն ունեցող Բաբ էլ-Մանդեբի նեղուցից 60-75 կիլոմետր հեռավորության վրա, ինչպես նաև մի քանի շրջաններ և «Խալիդ բին Վալիդ» ռազմական ճամբարը։
Հարձակման ֆոնին հութիները հրթիռային և անօդաչու թռչող սարքերով հարվածներ են հասցրել Սաուդյան Արաբիայի հարավային քաղաքներին, ինչի հետևանքով, ըստ ԶԼՄ-ների հաղորդումների, տուժել է առնվազն 73 մարդ։ Էր Ռիյադը պատասխանել է Եմենի մի քանի նահանգներում հութիների դիրքերին ավիահարվածներ հասցնելով։
Միևնույն ժամանակ երկրի հյուսիս-արևելքում Սաուդյան Արաբիայի աջակցությունը վայելող կառավարական ուժերը և Թարիք Սալեհի Ազգային դիմադրության կազմավորումները հայտարարել են Ալ-Ջաուֆ և Ալ-Բայդա շրջաններում հութիների դեմ առաջխաղացման մասին։
Բաբ էլ-Մանդեբի նեղուցը առանձնահատուկ ռազմավարական նշանակություն է ձեռք բերել ԱՄՆ-ի և Իսրայելի՝ Իրանի դեմ պատերազմի սկսվելուց հետո՝ դառնալով այլընտրանքային երթուղի՝ հորմուզի նեղուցի շրջափակման պատճառով նավթի մատակարարումների խափանումները մասնակիորեն փոխհատուցելու համար։ Reuters-ի գնահատմամբ՝ հութիների կողմից այս ջրային ուղու նկատմամբ լիակատար վերահսկողության հաստատումը կարող է Թեհրանին կարևոր ռազմական առավելություն տալ և նավթի գների կտրուկ աճ հրահրել։
