Բազմաբևեռ աշխարհի ձևավորումն «առանց բարդությունների չի ընթանում», քանի որ որոշ երկրներ փորձում են հակամարտություններ հրահրել և զսպել աճող մրցակիցներին։ ԲՐԻԿՍ-ի XVIII գագաթնաժողովի նիստում այս մասին հայտարարել է Ռուսաստանի նախագահ Վլադիմիր Պուտինը, փոխանցում է Կոմերսանտը։
Նրա խոսքով՝ մի շարք պետություններ պատրաստ չեն ընդունել համաշխարհային համակարգում տեղի ունեցող փոփոխությունները և շարունակում են «մտածել գաղութատիրական կատեգորիաներով»՝ ձգտելով «աշխարհը բաժանել ծաղկուն այգու ու վայրի ջունգլիների» և «ապրել ուրիշի հաշվին»։ Պուտինը չի հստակեցրել, թե հատկապես որ երկրները նկատի ունի։
«Նրանք պատրաստ չեն ընդունել փոփոխվող իրականությունը և ամեն կերպ ձգտում են զսպել աճող մրցակիցներին։ Գործադրվում են ցանկացած միջոցներ, այդ թվոմ՝ սակագնային պատերազմներ, ապօրինի պատժամիջոցներ, տնտեսական դիկտատի, շանտաժի, ներքին գործերին միջամտության փորձեր և պարզապես կոպիտ ուժ», — ասել է Ռուսաստանի նախագահը։
Պուտինի խոսքով՝ միաժամանակ վերաբացվում են լարվածության հին օջախները և հրահրվում նոր հակամարտություններ։ Արդյունքում, ըստ նրա, «խափանվում է միջազգային հարաբերությունների ամբողջ համակարգը», իսկ մի շարք բազմակողմ կառույցների ու ինստիտուտների արդյունավետությունը նվազում է։
Պուտինի հիշատակած «ծաղկուն այգու» և «ջունգլիների» կերպարն ավելի վաղ օգտագործել էր Եվրոպական միության արտաքին գործերի և անվտանգության քաղաքականության նախկին բարձր ներկայացուցիչ Ժոզեպ Բորելը։ 2022 թվականին նա Եվրոպան համեմատել էր պարտեզի հետ, որտեղ առկա են քաղաքական ազատություն, տնտեսական բարգավաճում և սոցիալական հավասարության ձգտում, իսկ մնացած աշխարհն անվանել էր ջունգլիներ։
Բորելի հայտարարությունները դժգոհություն էին առաջացրել ԱՄԷ-ում, որտեղ դրանք որակել էին որպես ռասիստական։ Եվրոպական դիվանագիտության նախկին ղեկավարը համաձայն չէր այդ գնահատականի հետ, սակայն ներողություն էր խնդրել իր խոսքերի համար։
