«Հրապարակ»-ը գրում է.
Վայոց ձորի երեք համայնքում՝ Վայքում, Եղեգնաձորում եւ Ջերմուկում, հոկտեմբերի 25-ին ՏԻՄ ընտրություններ են լինելու: Վայքում ՔՊ-ի թեկնածուն գործող համայնքապետ Մխիթար Մաթեւոսյանն է, որը 1997-2012թթ. զբաղվել է անհատ ձեռնարկատիրությամբ, 2012-2021թթ. եղել է«Մավշին» ՍՊԸ-ի հիմնադիր տնօրենը: 2021 թվականից նա ընտրվել է Վայք խոշորացված համայնքի ղեկավար: Մամուլը գրեց, որ համայնքի ղեկավար Մխիթար Մաթեւոսյանը մոտ 500 միլիոն դրամի պայմանագրեր է կնքել իր կնոջը՝ Մերի Մարգարյանին պատկանող ընկերության հետ: Իսկ Քննչական կոմիտեի 2019թ․ օգոստոսի 27-ի հաղորդագրությունում ասվում է, որ առանձնապես խոշոր չափերի հափշտակություն կատարելու համար մեղադրանք է առաջադրվել «Մավշին» ՍՊԸ-ի տնօրենին, որն այդ ժամանակ եղել է հենց Մաթեւոսյանը։Վայոց ձորի մեկ այլ համայնքում՝ Եղեգնաձորում, համայնքները կրկին կխոշորանան, Արենի եւ Եղեգիս համայնքները կմիանան Եղեգնաձորին:
3 համայնքներից ՔՊ-ն այստեղ առաջադրել է Արենի համայնքի ղեկավար Հուսիկ Սահակյանի թեկնածությունը: Նրա թեկնածությունը հանրությանը ներկայացրել է անձամբ Վայոց ձորի մարզպետ Վահագն Արսենյանը: Ի դեպ, Հուսիկ Սահակյանն այն համայնքապետն է, որն անգամ մեռած մարդու հոգեհանգիստն էր տեղափոխել, որ վարչապետի այցը չխաթարվի` իր պլանավորած ժամին: Իշխող կուսակցությունը, հավանաբար, նաեւ գնահատեց Սահակյանի այս քայլը եւ 3 համայնքների ղեկավարներից նրան ընտրեց թեկնածու: Հուսիկ Սահակյանը, ի տարբերություն Վայքի համայնքապետ Մխիթար Մաթեւոսյանի, ունի համայնքը ղեկավարելու փորձ: 1996-2005թթ. նա երեք անգամ անընդմեջ ընտրվել է Ռինդի ղեկավար։
Վերընտրվել է 2007, 2010 եւ 2014 թվականներին։ 2017 թվականից Արենի խոշորացված համայնքի ղեկավարն է:Ջերմուկցիները եւս այս տարի համայնքապետ կընտրեն: Մեզ հասած տեղեկություններով՝ Վայոց ձորի մարզպետ Վահագն Արսենյանն է պատրաստվում մասնակցել ՏԻՄ ընտրություններին, պատճառն այն է, որ առաջիկա մեկ-երկու տարում մարզպետարանները լուծարվում են, եւ համայնքապետերն արդեն իրենց գլխի ճարը տեսնում են: Վահագն Արսենյանին հարցրինք` պատրաստվո՞ւմ է իր թեկնածությունն առաջադրել ՏԻՄ ընտրություններում։ Ասաց, որ այս պահին դեռ այդպիսի որոշում չկա: Նշենք, որ այս 3 համայնքներում ընդդիմությունը եւս թեկնածուներ ունի, սակայն դեռ ոչ մեկը չի բարձրաձայնում թեկնածուների անունները, որ ժամանակից շուտ մարդկանց չթիրախավորեն:
Ի դեպ, սեպտեմբերի 10-ից սկսվել է հոկտեմբերի 25-ի ՏԻՄ ընտրությունների թեկնածուների գրանցումը: Մեզ ասացին, որ ընդդիմադիր թեկնածուները որոշել են գրանցվել վերջին օրը` սեպտեմբերի 20-ին:
