Ռուսաստանի Սոչի քաղաքը զանգվածային անօդաչու թռչող սարքերի հարձակման է ենթարկվում։ «Дождь»-ի փոխանցմամբ՝ գրոհը շարունակվել է շուրջ մեկ ժամ։
Սոչիի քաղաքապետ Անդրեյ Պրոշունինը Մոսկվայի ժամանակով ժամը 00։39-ին հայտնել է ԱԹՍ-ների հարձակման վտանգի մասին և բնակիչներին կոչ արել պատսպարվել անվտանգ վայրերում։
«Բոլոր ուժերն ու միջոցներն աշխատում են քաղաքի պաշտպանության համար։ Պատսպարվեք անվտանգ վայրում, պահպանեք հանգստություն»,- գրել է քաղաքապետը։
«Дождь»-ի աղբյուրների փոխանցմամբ՝ հարձակումը շարունակվում է, այն հետ մղելու համար գործի են դրվել ՀՕՊ համակարգերը, զենիթային միջոցներն ու շարժական կրակային խմբերը։
Տեղական «Сочи.txt» տելեգրամյան ալիքը գրում է, որ Սոչիի և Սիրիուսի ուղղությամբ նման ինտենսիվության գրոհ նախկինում չի արձանագրվել։
Հարձակման հետևանքների և հնարավոր տուժածների վերաբերյալ այս պահին պաշտոնական մանրամասներ չեն հաղորդվում։
