Շվեյցարիայում ձիաքարշ սայլի վթարի հետևանքով զոհվել է 73-ամյա մի կին, ևս մի քանի մարդ վնասվածքներ են ստացել, հաղորդում է SRF-ը։
Միջադեպը տեղի է ունեցել Գրաուբյունդեն կանտոնում, երբ մոտ 40 հոգուց բաղկացած զբոսաշրջային խումբը Ռոզեգտալ հովտով էքսկուրսիայից հետո վերադառնում էր Պոնտրեզինա՝ երկու ձիաքարշ սայլերով։
Ճանապարհի վայրէջք ունեցող հատվածում սայլերից մեկի վարորդը նկատել է, որ արգելակները բավարար արդյունավետ չեն աշխատում։ Նա փորձել է երեք ձիով լծված սայլը ուղղել դեպի ճանապարհի ավելի հարթ հատված, որպեսզի նվազեցնի արագությունը։ Սակայն մանևրի սկզբում ձիերից մեկն ընկել է, ինչից հետո վարորդը կորցրել է սայլը կառավարելու հնարավորությունը։
Սայլը մեծ արագությամբ բախվել է ճանապարհի եզրին գտնվող ծառին, իսկ ուղևորների մի մասը դուրս է շպրտվել սայլից։ 73-ամյա կինը ստացել է մահացու վնասվածքներ և տեղում մահացել է։
Տուժածներին Գրաուբյունդեն կանտոնի հիվանդանոցներ են տեղափոխել երեք ուղղաթիռով և շտապօգնության չորս մեքենայով։ Խմբի այն անդամներին, որոնք չեն տուժել, օգնություն են ցուցաբերել Պոնտրեզինայում գործող ճգնաժամային ծառայությունների մասնագետները։
Զբոսաշրջային խմբի բոլոր մասնակիցները Շվեյցարիայի բնակիչներ են։
Վթարի հանգամանքները քննում են դատախազությունը և Գրաուբյունդեն կանտոնի ոստիկանությունը։
