Շաբաթ երեկոյան Իսրայելի մի շարք քաղաքներում տեղի են ունեցել կառավարության դեմ բողոքի ցույցեր։ Ցուցարարները բողոքում էին Իսրայելի վարչապետ Բենիամին Նեթանյահուի քաղաքականության դեմ։
Haaretz թերթի փոխանցմամբ՝ Թել Ավիվում ավանդական շաբաթօրյա բողոքի ցույցի մասնակիցները, որոնք հիմնականում ձախակողմյան քաղաքական ուժերի կողմնակիցներ էին, այս անգամ նշել են տեղական ընդդիմության առաջնորդ Պետեր Մագյարի հաղթանակը Հունգարիայի խորհրդարանական ընտրություններում Վիկտոր Օրբանի նկատմամբ, ով երկար ժամանակ Նեթանյահուի գլխավոր դաշնակիցն էր Եվրոպայում։
Մոտ 250 մարդ երթով շարժվել է Հունգարիայի դեսպանատնից դեպի Թել Ավիվի կենտրոնում գտնվող Հաբիմա թատրոնի առջևի հրապարակ, որտեղ տեղի է ունեցել կառավարության դեմ ուղղված գլխավոր հանրահավաքը, որին մասնակցել է մոտ 2000 ցուցարար։
Իսրայելի կառավարության դեմ բողոքի ցույցեր են տեղի ունեցել երկրի մի շարք այլ քաղաքներում, այդ թվում՝ Բեեր Շևայում, Երուսաղեմում և Հայֆայում։ Երուսաղեմում, ըստ Իսրայելի ոստիկանության մամուլի ծառայության, բողոքի ցույցն ավարտվել է ցուցարարների և ոստիկանության միջև բախումներով, որի հետևանքով երկու մարդ ձերբակալվել է հասարակական կարգը խախտելու համար։
