ԱՄՆ նախագահ Դոնալդ Թրամփը հույս է հայտնել, որ Իրանի հետ խաղաղության համաձայնագրի կնքման դեպքում այն օգտակար կլինի բոլոր կողմերի համար, այդ թվում՝ Իսրայելի և Մերձավոր Արևելքում ԱՄՆ-ի մյուս դաշնակիցների համար։
«Հուսանք, որ կկարողանանք կնքել մի գործարք, որը լավ կլինի մեզ բոլորիս համար, այդ թվում՝ Մերձավոր Արևելքում մեր դաշնակիցների համար, ովքեր շատ լավ են եղել մեզ հետ, այդ թվում՝ Իսրայելի», – ասել է ԱՄՆ նախագահը Մեմֆիսում կայացած միջոցառման ժամանակ։
ԱՄՆ առաջնորդի խոսքով՝ Վաշինգտոնի և Թեհրանի միջև բանակցությունները սկսվել են մոտ երկու օր առաջ։ «Կարծում եմ՝ դրանք (բանակցությունները – խմբ.) շատ լավ են ընթանում։ Նրանք ցանկանում են խաղաղություն …։ Ես կասեի, որ կա հաջողության շատ մեծ հնարավորություն», – հայտարարել է ԱՄՆ առաջնորդը։
Միևնույն ժամանակ, Իրանի արտաքին գործերի նախարարության խոսնակ Էսմայիլ Բաղային ավելի վաղ IRNA լրատվական գործակալությանը հայտնել էր, որ Թեհրանը որևէ բանակցություններ չի վարել Վաշինգտոնի հետ, բայց միջնորդներին ներկայացրել է իր դիրքորոշումը։
