Ռուսաստանի արտաքին գործերի նախարար Սերգեյ Լավրովը և Սաուդյան Արաբիայի արտաքին գործերի նախարար Ֆեյսալ բին Ֆարհան Ալ Սաուդը հեռախոսազրույցում քննարկել են առևտրատնտեսական և այլ կապերի զարգացումը, ինչպես նաև Մերձավոր Արևելքի խաղաղության գործընթացը։
«Արտաքին գործերի նախարարները մանրամասն քննարկել են ռուս-սաուդյան բազմակողմանի կապերի հետագա ամրապնդման հեռանկարները։ Նրանք ընդգծել են Մոսկվայի և Էր-Ռիադի միջև քաղաքական երկխոսության բարձր տեմպի պահպանման, ինչպես նաև առևտրատնտեսական, ներդրումային և մշակութային-հումանիտար համագործակցության զարգացմանն ուղղված համատեղ ջանքերի ակտիվացման կարևորությունը», - հաղորդվում է Արտաքին գործերի նախարարության կայքում։
«Նրանք մտքեր են փոխանակել միջազգային և տարածաշրջանային օրակարգի մի շարք հրատապ հարցերի շուրջ, կենտրոնանալով պաղեստինա-իսրայելական խաղաղության գործընթացի, Իրանի շուրջ ստեղծված իրավիճակի և Եմենի իրավիճակի վրա», - հավելել է նախարարությունը։
