Սիգի ձվադրման սեզոնի հետ կապված՝ Սևանա լճում ամեն տարի արգելվում է սիգի որսը։ Նպատակը պարզ է՝ արդյունագործական մեծ պահանջարկ ունեցող ձկնատեսակի վերարտադրության ապահովումը։
Սիգի որսի արգելքը անցած տարվա նոյեմբերի 20-ից մինչև այս տարվա փետրվարի 1-ն էր։ Նախորդ տարվա համեմատ խախտումների թիվը նվազել է, ինչը ոչ միայն հսկող մարմինների աշխատանքի, այլև քաղաքացիների իրավագիտակցության բարձրացման արդյունք է։ Ու թեև այս անգամ ևս առաջնային տեղը տրվել է բացատրական աշխատանքին, ցավոք, խախտողներ կան։ Իսկ նման դեպքերում արդեն պետք է կիրառել վարչական ներգործության միջոցներ։ Հիշեցնենք, որ առանձին դեպքերում նման խախտումները ենթադրում են նաև քրեական պատասխանատվություն։
Արգելքի ընթացքում շուրջօրյա ծառայության արդյունքում էկոպարեկները հայտնաբերել են ապօրինի ձկնորսության 31 դեպք, կազմվել են արձանագրություններ։ Հայտնաբերված 27 լողամիջոց, ութ քարշակ և 189 ձկնորսական ցանց առգրավվել և տեղափոխվել են պահպանվող հատուկ տարածք։
էկոպարեկային ծառայությունը ակտիվորեն համագործակցել է ՆԳՆ ոստիկանության տարբեր ստորաբաժանումների հետ ինչպես ցամաքում, այնպես էլ ջրի վրա իրականացրած միջոցառումների ընթացքում։
Հիշյալ քողարկված տեղափոխման դեպքերից հիշենք երկուսը։ Հունվարի 22-ին Պարեկային ծառայության Գեղարքունիքի մարզի գումարտակի ջրային պարեկները Երևան-Սևան-Իջևան ճանապարհին կանգնեցրել են մի ավտոմեքենա, որի շարժիչի ծածկոցի տակ հայտնաբերվել է 74 հատ սիգ։ Մի դեպք էլ ջրային պարեկները բացահայտել են հունվարի 28-ի գիշերը։ Ծովագյուղ-Շորժա-Վարդենիս ճանապարհին նրանք կանգնեցրել են մի քարշակ, որը տեղափոխում էր «Օպել» մակնիշի մեքենա: Ստուգմամբ «Օպելի» սրահում հայտնաբերվել է 230 կիլոգրամ սիգ:
Խախտումների հայտնաբերման գործում ակտիվ դերակատարում ունեն Պարեկային ծառայության Գեղարքունիքի մարզային գումարտակի ծառայողները։
ՊԾ պարեկային ծառայության կազմակերպման վարչության պետ Տիգրան Ավետիսյանի խոսքով՝ Սևանա լճում սիգի որսի արգելքի ժամանակահատվածում Գեղարքունիքի մարզային գումարտակի պարեկները հայտնաբերել են ապօրինի որսի 58 դեպք, որոնցից 40-ի վերաբերյալ նախաձեռնվել է վարչական, իսկ 18-ի՝ քրեական վարույթ։ Հայտնաբերվել և առգրավվել է 12 հազար սիգ՝ մոտ 4,5 տոննա քաշով։ Առգրավվել են նաև որսագործիքներ ու լողամիջոցներ, մասնավորապես՝ նավակներ, շարժիչներ, ձկնորսական ցանցեր և այլն։
Սիգի ապօրինի որսը կանխելու միջոցներից մեկն էլ ձկան վաճառքի կանխումն ու բացահայտումն է։ Այդ ուղղությամբ ոստիկանությունը միջոցառումներ է ձեռնարկել հանրապետության ողջ տարածքում։
Բնապահպանության և ընդերքի տեսչական մարմնի տարածքային բաժինների հետ համատեղ ձեռնարկած միջոցառումների արդյունքում պարեկային ծառայության աշխատակիցները Շիրակի մարզում հայտնաբերել են 273 կգ, Վայոց ձորում՝ 32, Տավուշում՝ 147, իսկ Կոտայքում՝ 182 կգ սիգ։ Սիգի վաճառքի դեպքեր են կանխվել նաև մայրաքաղաքում։
Միջոցառումներին մասնակցել են նաև Համայնքային ոստիկանության ծառայողներ․ հայտնաբերվել է 78 կիգ սիգ։
Խախտումներ հայտնաբերելը, խախտողներին պատասխանատվության ենթարկելը, որսամիջոցներ առգրավելն ու այլ պատժիչ միջոցները կարևոր են, ունեն կանխարգելիչ նշանակություն։
Ապօրինի որսի դեմ պայքարը Ներքին գործերի ու Շրջակա միջավայրի նախարարությունների և պատկան այլ մարմինների համագործակցության միակ ուղղությունը չէ։ Բնապահպանական բոլոր խնդիրներ են ուշադրության կենտրոնում, և տարբեր կառույցների տարեցտարի ակտիվացող համագործակցությունն է, որ պետք է ապահովի երկրի համար կենսական այդ խնդիրների լուծումը։
