Ամերիկյան սոցիոլոգիական ծառայությունը՝ Gallup-ը, 88 տարվա ընթացքում առաջին անգամ չի չափի ԱՄՆ նախագահի գործունեության հավանության վարկանիշը։ Այդ մասին հաղորդում է The Hill թերթը։
Թերթի տվյալներով՝ ընկերությունը կդադարեցնի «առանձին քաղաքական գործիչների» հավանության վարկանիշների հրապարակումը, ինչը «արտացոլում է Gallup-ի մոտեցման զարգացումը հանրային հետազոտությունների և մտավոր առաջնորդության ոլորտում»։
Պարբերականի հարցին, թե արդյոք սոցիոլոգիական ծառայությունը որևէ ցուցում ստացել է Սպիտակ տնից, Gallup-ի ներկայացուցիչը պատասխանել է, որ «սա ռազմավարական քայլ է, որը հիմնված է բացառապես ընկերության հետազոտական նպատակների և առաջնահերթությունների վրա»։
2025 թվականի դեկտեմբերին Gallup-ի անցկացրած վերջին հասարակական կարծիքի հարցման համաձայն՝ ԱՄՆ նախագահ Դոնալդ Թրամփի քաղաքականության հավանության վարկանիշը նվազել է մինչև 36%, ինչը նրա երկրորդ ժամկետի ընթացքում ամենացածր ցուցանիշն է։ Ժամկետի սկզբում՝ 2025 թվականի հունվարին, Թրամփի վարկանիշը կազմել էր 47%։
