Իսրայելի ռազմաօդային ուժերը կործանիչներ են բարձրացրել Wizz Air ուղևորատար ինքնաթիռին ուղեկցելու համար այն բանից հետո, երբ ինքնաթիռում գտնվող երեխան իր հեռախոսի Wi-Fi-ը անվանել է «ահաբեկիչ», հաղորդում է Daily Mail-ը։
Լրատվամիջոցների հաղորդագրությունների համաձայն՝ Wizz Air-ի ինքնաթիռը մեկնել էր Լուտոնի օդանավակայանից և ուղևորվում էր դեպի Բեն Գուրիոն օդանավակայան, երբ ուղևորներից մեկը իր հեռախոսում տեսել է հաղորդագրություն, որը նա մեկնաբանել է՝ որպես սպառնալիք։
Ավելի ուշ պարզվել է, որ «հաղորդագրությունը» այն Wi-Fi-ի անունն է, որը երեխան ստեղծել է իր հեռախոսում՝ ցանցը անվանելով «ահաբեկիչ»։ Անսովոր անունը արագորեն տագնապ է առաջացրել ուղևորների և անձնակազմի շրջանում, ինչը ստիպել է ձեռնարկել անվտանգության միջոցառումներ։
Դեպքից հետո Իսրայելի ռազմաօդային ուժերը մի քանի կործանիչներ են բարձրացրել ինքնաթիռին Թել Ավիվ ուղեկցելու համար։ Վայրէջքից առաջ ինքնաթիռը երեք անգամ պտտվել է Միջերկրական ծովի վրա։
