Հունգարիան կտրամադրի հյուպատոսական աջակցություն իր այն քաղաքացուն, որը ձերբակալվել է Ուկրաինայում՝ հինգ ուկրաինացիների երկրից փախչելուն աջակցելու փորձի համար։ Վերջիններս վախենում էին ռազմաճակատ ուղարկվելուց։ Այդ մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ ընդգծելով, որ մարդիկ «հուսահատ փորձում են փախչել Ուկրաինայից», որպեսզի չհայտնվեն բանակում պարտադիր զորակոչի։
«Վերջերս ուկրաինական իշխանությունները ձերբակալել են Հունգարիայի քաղաքացու, որը փորձել է օգնել հինգ ուկրաինացիների փախչել Հունգարիա։ Բերեգովոյում գտնվող մեր գլխավոր հյուպատոսությունն անմիջապես նրան տրամադրել է հյուպատոսական պաշտպանություն, և մենք աջակցում ենք նրան ոստիկանության կողմից իրականացվող հետաքննության ընթացքում», — գրել է ԱԳ նախարարը Facebook սոցիալական ցանցում։
«Ուկրաինայի ժողովուրդը չի ցանկանում մահանալ, սակայն ամեն օր մենք տեսնում ենք զինվորական ծառայության հարկադրական զորակոչի բռնի գործողությունների կադրեր, իսկ ուկրաինական քաղաքների փողոցներում հաճախ ընթանում է մարդկանց բացահայտ որս։
Շատ ուկրաինացի տղամարդիկ՝ պապեր, հայրեր, եղբայրներ, որդիներ և թոռներ, հուսահատ փորձում են լքել Ուկրաինան՝ խուսափելու համար զորակոչից, ռազմաճակատ ուղարկվելուց և հնարավոր մահվան վտանգից։ Սակայն ուկրաինական սահմանապահ ծառայությունը անում է ամեն հնարավոր բան և օգտագործում է բոլոր միջոցները՝ փախուստի դիմածներին բռնելու համար», — հավելել է Սիյարտոն։
