Պենտագոնը մտադիր է Ավստրալիայի արևմուտքում գտնվող, ընդլայնվող Սթերլինգ ռազմածովային բազայում տեղակայել չորս միջուկային սուզանավ՝ Չինաստանի զսպմանն ուղղված դաշնակիցների ռազմավարության շրջանակում։ Ինչպես հաղորդում է The Wall Street Journal (WSJ)-ը, առաջին սուզանավը պետք է այնտեղ խարսխվի 2027 թվականին։
Կանբերրան Սթերլինգ բազայում ուսումնական կենտրոնի ստեղծման, ռադիոակտիվ թափոնների պահեստավորման օբյեկտի կառուցման, սուզանավերի համար նավամատույցի արդիականացման և էլեկտրամատակարարման համակարգերի զարգացման համար հատկացնում է 5,6 միլիարդ ԱՄՆ դոլար։ Անցած տարվա վերջին բազայում մոտ չորս շաբաթ գտնվել է չորրորդ սերնդի USS Vermont միջուկային սուզանավը՝ Virginia դասի։ Ամերիկյան և ավստրալական անձնակազմերը համատեղ իրականացրել են միջուկային սուզանավի սպասարկման տարբեր աշխատանքներ։
Ավստրալիայի իշխանությունները նաև արդեն հատկացրել են 8,4 միլիարդ ԱՄՆ դոլար Պերթ քաղաքի մերձակայքում՝ Հենդերսոնում, տեխնիկական սպասարկման և նավաշինության գոտու ստեղծման համար, որը, ինչպես սպասվում է, կներառի չոր նավահանգիստներ (dry docks), որոնք անհրաժեշտ են խոշոր վերանորոգման և առավել ծավալուն տեխնիկական սպասարկման աշխատանքների համար։
Հրապարակման մեջ նշվում է, որ սուզանավերի վերանորոգման և տեխնիկական սպասարկման իրականացումը Արևմտյան Ավստրալիայում թույլ կտա ԱՄՆ ռազմածովային ուժերին գտնվել հնարավոր լարվածության օջախներին մոտ, այդ թվում՝ Հարավչինական ծովում։
