Փետրվարի 5-ին Կինոմոսկվայում տեղի ունեցավ «Արարատ 73» սպորտային դրամայի երևանյան պրեմիերան։«Արարատ 73» ֆիլմը նվիրված է «Արարատ» ֆուտբոլային թիմի պատմական հաղթանակին և թիմի գլխավոր մարզիչ, խորհրդային ֆուտբոլի լեգենդ Նիկիտա Սիմոնյանի հիշատակին։
Նրա գլխավորությամբ «Արարատը» անհնարինը դարձրեց հնարավոր՝ մեկ տարվա ընթացքում դառնալով թե՛ ԽՍՀՄ գավաթակիր, թե՛ ԽՍՀՄ չեմպիոն։ Այդ հաղթանակը դարձավ ոչ միայն սպորտային ձեռքբերում, այլև ազգային միասնության ու ոգու ուժի խորհրդանիշ։
Ֆիլմի ռեժիսորն է Մհեր Մկրտչյանը, գլխավոր պրոդյուսերը՝ Վալերի Սահարյանը։ Վերջինս հայտնել է, որ ֆիլմը ցուցադրվել է Ռուսաստանի Դաշնության 1846 կինոթատրոնում՝ Կամչատկայից մինչև Կալինինգրադ։ «Արարատ 73»-ը ցուցադրվում է նաև Բելառուսում և Ղազախստանում։Ֆիլմի դրվագներում հեղինակները կարողացել են վերականգնել 1970-ականների Երևանի մթնոլորտն ու կենցաղը։
Ռեժիսոր Մհեր Մկրտչյանի խոսքով՝ ֆիլմի գլխավոր ուղերձը հաղթանակի գաղափարի ներկայացումն է՝ որպես հավատքի ու միասնականության արդյունք։Երեկոյի ամենասպասված հյուրերը «Արարատ» ֆուտբոլային լեգենդար թիմի ողջ մնացած խաղացողներն էին՝ Էդուարդ Մարգարովը, Սերգեյ Բոնդարենկոն, Նորիկ Մեսրոպյանը և Սերգեյ Պողոսյանը։
Դերասան Լևս Դավթյանը, որը մարմնավորում է թիմի ավագի կերպարը, նշել է.«Մեզ համար շատ բարդ ու պատասխանատու էր ստանձնել այս դերերը։ Նկարահանումները հեշտ չէին, քանի որ մենք ֆուտբոլիստ չենք, դերասան ենք։
Միայն երկարատև պարապմունքներից և քրտնաջան աշխատանքից հետո կարողացանք դաշտում խաղալ»։Ֆիլմում նկարահանվել են Եգոր Բերոևը, Սոֆիա Դոնիյանցը, Քսենիա Ալֆերովան, Սերգեյ Շակուրովը, Սերգեյ Գազարովը, Բաբկեն Չոբանյանը, Անդրանիկ Խաչատրյանը, Դավիթ Մանոյանը, Արծրուն Չոբանյանը, Հայկ Աղաքարյանը (Freestyle), Սեյրան Մովսիսյանը, Լևս Դավթյանը, Էդվին Հակոբյանը և Անահիտ Կիրակոսյանը։
