Այսօր ընթերցվել է Մեծի Տանն Կիլիկիո կաթողիկոս Արամ Առաջինի հայրապետական հռչակագիրը։
Հայրապետը 2026թ.-ը հայտարարել է «Հոգևոր կյանքի վերանորոգման տարի» և այսուհետ ամեն տարի Սուրբ ծնունդին հաջորդող կիրակի օրը պատարագի ժամանակ ընթերցվելու է նրա հայրապետական հռչակագիրը։
Արամ Առաջինն իր այս տարվա հռչակագրում նշել է, որ պարագայական որոշում չէ այս տարին հոգևոր կյանքի վերանորոգմանը նվիրելը, այլ հրամայական անհրաժեշտություն՝ հաշվի առնելով հայի կյանքի մեջ հոգևոր կյանքի առանցքային կարևորության նահանջը։
Հայրապետը նշել է նաև, որ այսօր իրավիճակից ելնելով, հայ ժողովրդի մոտ հոգևոր կյանքը չի ներկայացնում այն նույն կենսական վիճակն ու հարազատ պատկերը, ինչպես եղել է անցյալում։
«Հայ եկեղեցին դարձել է առավելապես ծիսակենտրոն, հետևաբար, հրամայական և անհետաձգելի է ծիսական կյանքի բարեփոխումը՝ ներկա պայմաններին և պահանջներին համապատասխանեցնելով և ժողովրդի գործուն մասնակցությամբ։ Առանց անտեսելու ազգային արժեքների կարևորությունը, անհրաժեշտ է, որ եկեղեցին հատուկ նախաձեռնություններով հանդես գա՝ շեշտը դնելով հոգևոր արժեքների վրա»,– ասվում է հռչակագրում։
