Հունվարի 2-ին, արտակարգ դեպք է տեղի ունեցել Սյունիքի մարզում։ Ժամը 00։20-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Գորիսի բաժնում օպերատիվ տեղեկություններ են ստացվել, որ «քթոսկրերի կոտրվածք հարցականով, թիակի կտրած-ծակած վերք աջից» ախտորոշմամբ «Գորիս» բժշկական կենտրոն է տեղափոխվել մի քաղաքացի, հայտնում է Shamshyan.com-ը։
Հիվանդանոց է մեկնել ոստիկանության Գորիսի բաժնի օպերատիվ խումբը՝ ավագ համայնքային ոստիկանի գլխավորությամբ։
Տեղում բժիշկները ոստիկաններին հայտնել են, որ վիրավորը ի վիճակի չէ կատարվածի մասին բացատրություն տալու, քանի որ գտնվում է վիրահատարանում։
Տեղում ոստիկանները պարզել են, որ վիրավորը Սյունիքի մարզի բնակիչ 43-ամյա Հարություն Զ․-ն է։
Պարզվել է, որ հունվարի 1-ին ժամը 23։00-ի սահմաններում Գորիս քաղաքի Գուսան Աշոտ փողոցի 25/2 հասցեում գործող Հարություն Զ․-ին պատկանող «Հարություն Զաքարյան» Ա/Ձ համակարգչային խաղերի սրահում, անձնական հարցերի շուրջ վիճաբանություն է ծագել Սյունիքի մարզի բնակիչներ 19-ամյա Յուրի Հ․-ի, 15-ամյա Ա․ Հ․-ի, 16-ամյա Ս․ Մ․-ի և Հարություն Զ․-ի որդու 17-ամյա Ա․ Զ․-ի միջև, որը շարունակվել է խաղասրահից դուրս, որին մասնակցել են նաև Հարություն Զ․-ն, Յ․Հ․-ի հայրը, Սյունիքի մարզի բնակիչ 43-ամյա Էրիկ Հ․-ն և Ս․Մ․-ի հայրը, Սյունիքի մարզի բնակիչ 37-ամյա Էրիկ Մ․-ն, որի ընթացքում Հարություն Զ․-ն փայտե մահակով հարվածներ է հասցրել Էրիկ Հ․-ին և Էրիկ Մ․-ին, ինչից հետո Էրիկ Հ․-ն վերցրել է մահակը, հարվածներ հասցրել նրա դեմքին՝ պատճառել քթի կոտրվածքներ, իսկ Էրիկ Մ․-ն իր մոտ եղած սուր կտրող-ծակող գործիքով հարվածել է վերջինիս աջ թիակին՝ պատճառելով «թիակի կտրած-ծակած վերք աջից» մարմնական վնասվածքը:
Դեպքի փաստով ոստիկանության Գորիսի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Սյունիքի մարզային քննչական վարչություն։
