Իսրայելը մտադիր է «վերականգնել կարգուկանոնը» երկրի հարավում գտնվող Նեգև անապատում և կտրուկ արագացնել տարածաշրջանում բնակեցման տեմպը։ Այս մասին հայտարարել է վարչապետ Բենիամին Նեթանյահուն Արևմտյան Նեգև կատարած աշխատանքային այցի ժամանակ, որը տեղի է ունեցել հրեական բնակչության և անապատում ապրող բեդվինների միջև լարվածության աճի լույսի ներքո։
Վարչապետի գրասենյակի հաղորդմամբ՝ Նեթանյահուին ուղեկցում էին մի շարք պետական պաշտոնյաներ, այդ թվում՝ պաշտպանության նախարար Իսրայել Կացը և ազգային անվտանգության նախարար Իտամար Բեն-Գվիրը, ինչպես նաև մի շարք այլ բարձրաստիճան պաշտոնյաներ։ Նա նշել է, որ պատվիրակությունը ժամանել է «մեկ նպատակով՝ Նեգևը վերադարձնել Իսրայելի պետությանը»։ «Սա նշանակում է աննախադեպ մասշտաբի վերաբնակեցում, դա նաև նշանակում է բեդվին բնակչության կարիքների բավարարում:
Բայց, առաջին հերթին, դա նշանակում է օրենքի և կարգուկանոնի վերականգնում: Նեգևում տիրում է անօրինություն: Մենք կզսպենք այն, և արդեն սկսվել է Իսրայելի ոստիկանության խոշոր գործողությունը, որն իրականացվում է այլ ուժերի հետ։ Դա անելու համար մենք պետք է հասկանանք, որ հանցավոր և անվտանգության սպառնալիքները միավորվել են՝ տասնյակ հազարավոր զենքեր, սահմանները հատող անօդաչու թռչող սարքեր և այլ սպառնալիքներ», -ասել է վարչապետը։
Նեգևը զբաղեցնում է Իսրայելի տարածքի կեսից ավելին։ Անապատը սահմանակից է Եգիպտոսին, և պարբերաբար հաղորդագրություններ են ստացվում զենքի մաքսանենգության մասին, այդ թվում՝ անօդաչու թռչող սարքերի միջոցով, դեպի Գազայի հատված։
