Ուկրաինայի և Ռուսաստանի միջև պատերազմի ընթացքում ռուսական կողմը մեծ նշանակություն է տալիս Զապորոժիեի մարզի Հուլյաիպոլե քաղաքի նկատմամբ վերահսկողություն հաստատելուն: Այդ նպատակով, ըստ տեղեկությունների, այնտեղ լրացուցիչ պահեստազոր է տեղակայվում, իսկ քաղաքի ենթակառուցվածքները ենթարկվում են ինտենսիվ հարձակումների: Ռուսական զորքերը փորձում են ոչնչացնել քաղաքի բոլոր շենքերը: Այս մասին հեռուստամարաթոնի հեռարձակման ժամանակ հայտարարել է Հարավային Ուկրաինայի պաշտպանության ուժերի խոսնակ Վլադիսլավ Վոլոշինը:
Նրա խոսքով, ամենադժվար իրավիճակը մնում է Հուլյաիպոլեի շրջանում և ընդհանուր առմամբ Հուլյաիպոլեի հատվածում: Լարվածություն է գրանցվում նաև Օլեքսանդրիվսկե հատվածում:
Վոլոշինը հայտնել է, որ Հուլյաիպոլեում շարունակվում են թեժ մարտերը: Ռուսական ստորաբաժանումները փորձում են ներթափանցել քաղաք, սակայն ուկրաինական ուժերը պնդում են, որ հետ են կանգնել և կորուստներ են պատճառել առաջխաղացող ուժերին:
Վոլոշինի խոսքով՝ վերջին 24 ժամվա ընթացքում քաղաքում գրանցվել է մոտ երկու տասնյակ զինված բախում։
Նա նաև հայտնել է, որ հարվածներ են հասցվում անօդաչու թռչող սարքերի և ինքնաթիռների, այդ թվում՝ կառավարվող ռումբերի միջոցով։ Նա նշել է, որ նպատակը քաղաքում շենքերի և ամրությունների ոչնչացումն է։ Նա նաև ընդգծել է, որ ուկրաինական ստորաբաժանումները շարունակում են ներկա լինել ինչպես Հուլյաիպոլում, այնպես էլ նրա արևմտյան ծայրամասերում։
Վոլոշինը նշել է, որ Հուլյաիպոլեի նկատմամբ երահսկողություն հաստատելու մասին ռուսական հաղորդագրությունները կեղծ են։
Նա նշել է, որ քաղաքի շուրջ ակտիվ գործողությունները ցույց են տալիս դրա ռազմավարական նշանակությունը, քանի որ Հուլյաիպոլեն տարածաշրջանի ամենամեծ քաղաքն է և կարևոր լոգիստիկ հանգույց, որը հնարավորություն է տալիս մուտք գործել դեպի Զապորոժիե և Դնեպրոպետրովսկի մարզ տանող ճանապարհներ։
