2026 թ․ հունվարի 23-ին վերածնված «Արցախի բալիկներ» մանկապատանեկան համույթը նոր պայմաններում հանդես կգա իր անդրանիկ համերգով։
«Արվախի կանչը» խորագրով համերգային ծրագիրն ընդգրկում է հայտնի կոմպոզիտորների և արցախյան ժողովրդական ստեղծագործություններ․ «Հորովել», «Ղարաբաղցին», «Կալի երգ», «Խբեցե, հրեցե», «Աղե արկանք», «Հըրսանեք», «Դերունց ծորում», «Նախշուն բաջի», «Կենաց երգ», «Ճեղաց», «Հընգեր», «Մեր գյուղը», «Ղարաբաղ իմ», «Արցախ», «Փառք մեր ազգության»։ Արցախի պատանի երաժիշտների համերգը տեղի կունենա Հովհաննես Թումանյանի անվան Ազգային Տիկնիկային թատրոնի բեմում։
Հանրաճանաչ համույթը, որն Արցախում պետական կարգավիճակ ուներ, հիմնադրվել է 1989 թ․ Ստեփանակերտում։ 2008 թվականից այս ինքնատիպ մշակութային հաստատությունը, որի բովով մի քանի սերնդի երաժիշտներ են անցել, գործել է հայտնի մանկավարժ Գայանե Հարությունյանի գեղարվեստական ղեկավարությամբ։
Սույն թվականի նոյմեբերի 12-ին «ԴԻԱԼՈԳ» հասարակական կազմակերպության նախագահ Յուրի Նավոյանը և Գայանե Հարությունյանը համագործակցության մասին համաձայնագիր են ստորագրել՝ «Արցախի բալիկներ» համույթի վերակազմավորման և նրա կայուն գործունեության ապահովման նպատակով։ Դեկտեմբերի 1-ից վերակազմավորված համույթը, որի կազմում Արցախից բռնի տեղահանված 28 պատանի երաժիշտներ են, գործում է մշտական հիմունքներով՝ փորձերն անցկացնելով «ԴԻԱԼՈԳ» մշակութային կենտրոնում։ Ըստ մշակված ստեղծագործական պլանի, «Արցախի բալիկներ» համույթը 2026 թվականի ընթացքում «ԴԻԱԼՈԳ» կազմակերպության հովանավորությամբ պարբերաբար ելույթներ կունենա հետաքրքիր ու հրապուրիչ ծրագրերով՝ ներկայացնելով Արցախի ժողովրդական ստեղծագործությունները և մշակութային ավանդույթները։
