Եվրամիությունը պետք է համաձայնության գա Ռուսաստանի սառեցված ակտիվների ապագայի վերաբերյալ և գտնի «տեխնիկական լուծում»՝ Ուկրաինայի համար ավելի հստակ ապագա ապահովելու համար։ Այս մասին լրագրողներին հայտարարել է Ֆրանսիայի նախագահ Էմանուել Մակրոնը՝ Բրյուսելում ԵՄ գագաթնաժողով ժամանելուն պես։
Նա նշել է, որ ռուսական ակտիվները մշտապես սառեցնելու մասին ավելի վաղ ընդունված որոշումը թույլ տվեց եվրոպացիներին «ապահովել իրենց համար ավելի հստակ հեռանկարներ»։
Եվ հիմա նույն հեռանկարների պարզությունը պետք է ապահովվի Ուկրաինայի համար՝ «իր ռազմական ջանքերը ֆինանսավորելու» համար՝ որոշելով այդ սառեցված ակտիվների օգտագործման մասին, հավելել է Մակրոնը։
Նրա խոսքով՝ Եվրահանձնաժողովը «առաջարկել է մի քանի տարբերակ, և կարևոր քննարկումներ են ընթանում այդ սառեցված ռուսական ակտիվների օգտագործման վերաբերյալ»։ «Մենք պետք է ապահովենք Ուկրաինայի հեռանկարների հստակությունը։ Մենք պետք է ունենանք մեկ ընդհանուր նպատակ՝ օգնել Ուկրաինային ֆինանսավորել իր ռազմական ջանքերը», - ասել է նա։
