Թուրքիայի արտաքին գործերի նախարար Հաքան Ֆիդանը հայտարարել է, որ Ստամբուլը մնում է միակ վայրը, որտեղ Ռուսաստանն ու Ուկրաինան կարողացել են քննարկել կարգավորման հարցը, և Անկարան պատրաստ է վերսկսել այս բանակցային գործընթացը։
«Ռուս-ուկրաինական պատերազմը մեր տարածաշրջանի առջև ծառացած ամենադժվար փորձություններից մեկն է։ Առաջին իսկ օրվանից մեր սկզբունքը հստակ էր. պատերազմում հաղթողներ չկան, իսկ արդար խաղաղության մեջ՝ պարտվողներ։
Այս համոզմամբ առաջնորդվելով՝ մենք այն երկիրն էինք, որն ամենաինտենսիվ ջանքերը գործադրեց պատերազմը դիվանագիտական միջոցներով ավարտելու համար։
«Ստամբուլը մնում է միակ վայրը, որտեղ կողմերը կարողացել են հանդիպել տեխնիկական մակարդակով և քննարկել խաղաղ կարգավորման պարամետրերը», - ասել է նախարարը Անկարայում բացված ամենամյա դեսպանների համաժողովում։
Նա հավելել է, որ Թուրքիայում բանակցություններ անցկացնելը «թուրքական դիվանագիտության նկատմամբ վստահության դրսևորում է»։
«Թուրքիան պատրաստ է իրականացնել ցանկացած նախաձեռնություն, աջակցելու դեր խաղալ և վերականգնել խաղաղության բանակցությունների հարթակը՝ պատերազմը դիվանագիտական միջոցներով ավարտելու նպատակով», - հավելել է նա։
