Ամերիկյան «CNN» միջազգային լրատվականը հրապարակել է «Աշխարհի 50 լավագույն հացերի» ցանկը։ Ցանկում ներառված են ավանդական հացեր բազմաթիվ երկրներից՝ Մալայզիայից մինչև Վենեսուելա, Գերմանիայից մինչև Թուրքիա, Աֆղանստանից մինչև Հայաստան։
Լավագույն հացերի ցանկում ներառված է հայկական լավաշը։ Ներառված է նաև Թուրքիայում հայտնի սիմիթը, որը խրթխրթան օղակաձև հաց է՝ պատված քնջութի սերմերով։ Ցանկում տեղ են գտել նաև աֆղանական բոլանին, ֆրանսիական բագետը, իտալական չիաբատտան։
Նշվում է, որ հացը պարզապես սնունդ չէ, այն մշակույթի, պատմության և ինքնության արտացոլումն է։ Յուրաքանչյուր հաց պատմում է իր երկրի ու մարդկանց կենսակերպի մասին: Սննդի համար ճամփորդողները կարող են օգտագործել այս ցանկը որպես ոգեշնչում իրենց ճանապարհորդությունը ծրագրելիս:
