Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի միջև կայանալիք հանդիպման մանրամասներ դեռևս չկան, հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով Վլադիմիր Զելենսկու՝ Բուդապեշտում կայանալիք ռուս-ամերիկյան գագաթնաժողովին մասնակցելու հնարավորությունը։
«Երկու նախագահների կողմից քննարկված հանդիպման վերաբերյալ մանրամասներ դեռևս չկան», - լրագրողներին ասել է Պեսկովը։
Անցյալ շաբաթ Ռուսաստանի և Միացյալ Նահանգների առաջնորդները տարեսկզբից ի վեր ութերորդ հեռախոսազրույցն ունեցան։
Երկուսուկես ժամ տևած զրույցից հետո Ռուսաստանի նախագահի օգնական Յուրի Ուշակովը հայտարարեց, որ Մոսկվան և Վաշինգտոնը անմիջապես կսկսեն նախապատրաստվել երկու երկրների ղեկավարների միջև նոր հանդիպմանը, որը կարող է տեղի ունենալ Բուդապեշտում։
Ուշակովի խոսքով՝ ամերիկացի առաջնորդն առաջարկել է Հունգարիայի մայրաքաղաքը, իսկ Ռուսաստանի նախագահը աջակցել է այդ գաղափարին։
