Հոկտեմբերին Վրաստանի իշխանությունները նախատեսում են դատական հայց ներկայացնել երկրի Սահմանադրական դատարան՝ պահանջելով արգելել նախկին նախագահ Միխեիլ Սաակաշվիլիի կողմից հիմնադրված ընդդիմադիր «Միացյալ ազգային շարժում» կուսակցությունը, ինչպես նաև կուսակցության հայացքներն ու քաղաքականությունը կիսող այլ քաղաքական խմբավորումները: Այս մասին լրագրողներին հայտնել է Վրաստանի վարչապետ Իրակլի Կոբախիձեն:
«Մենք, հավանաբար, հոկտեմբերին դատական հայց կներկայացնենք՝ «Ազգային շարժման» կոլեկտիվ կազմող բոլոր կուսակցությունները հակասահմանադրական ճանաչելու համար։ Սա ժողովրդավարական գործընթաց է, և հայցը անպայման կներկայացվի Սահմանադրական դատարան», - ասել է Կոբախիձեն։
Ինչպես նշել է Վրաստանի կառավարության ղեկավարը, դատական հայց ներկայացնելու հիմքը կլինի Սաակաշվիլիի դարաշրջանի հանցագործությունները հետաքննող ժամանակավոր խորհրդարանական հանձնաժողովի եզրակացությունը։
Փետրվարից օգոստոս ընկած ժամանակահատվածում Վրաստանի խորհրդարանում նիստեր էր գումարում Սաակաշվիլիի 2003-2012 թվականների կառավարման տարիներին կատարված հանցագործությունները հետաքննող ժամանակավոր հանձնաժողովը։
Նիստերի ընթացքում հանձնաժողովի անդամները լսում էին այդ տարիների իրադարձությունների ականատեսների՝ քաղաքական գործիչների, զինվորականների և սովորական քաղաքացիների ցուցմունքները։
