NBC-ն հաղորդում է, որ 15-ամյա կալիֆոռնիացի դեռահասի մայրը՝ Ռեբեկա Դալասը, դատական հայց է ներկայացրել խաղային հսկա Roblox-ի և Discord հաղորդակցման հարթակի դեմ՝ պնդելով, որ նրանց «անպատասխանատու և խաբուսիկ» գործողությունները հանգեցրել են իր որդու սեռական շահագործմանը և հետագա մահվանը։
Սան Ֆրանցիսկոյի շրջանի գերագույն դատարան ներկայացված դատական հայցը նկարագրում է Իթան Դալասի ողբերգական պատմությունը, որը նկարագրվում է որպես խելացի, ստեղծագործ դեռահաս, ով կրքոտ էր խաղերի, հոսքային հեռարձակման և առցանց հաղորդակցության հանդեպ։ Նա սկսել է օգտագործել Roblox հարթակը ինը տարեկանում՝ ծնողների թույլտվությամբ և ծնողական վերահսկողության միացված ռեժիմով։
Փաստաբանների խոսքով՝ 12 տարեկանում Իթանը դարձել է չափահաս այլասերվածի զոհ, ով ձևացել է երեխա։ Թվացյալ անմեղ զրույցները աստիճանաբար վերածվել են սեռական թեմաների քննարկման և բացահայտ բովանդակության տարածման։
Հետագայում հանցագործը համոզել է դեռահասին անջատել ծնողական վերահսկողության ռեժիմը և անցնել Discord-ի՝ հետագա հաղորդակցության համար։ Այնտեղ բացահայտ լուսանկարների և տեսանյութերի պահանջները սրվել են, որին հաջորդել են դրանք հրապարակելու սպառնալիքները։ Այս փորձության արդյունքում Իթանը ինքնասպանություն է գործել տասնհինգ տարեկան հասակում՝ 2024 թվականի ապրիլին։
Հայցում նշվում է անփութության հետևանքով սպանության, խարդախության, կեղծ տեղեկատվության և օգտատիրոջ անվտանգությունը չապահովելու մեղադրանք։ Հիմնական փաստարկն այն է, որ պատշաճ պաշտպանության միջոցների կիրառումը, ինչպիսիք են տարիքը և ինքնության ստուգումը, կարող էր կանխել ողբերգությունը։
Ռեբեկա Դալլասը պնդում է, որ ինքը հավատացել է, որ հարթակները անվտանգ են իր երեխայի համար՝ հիմնվելով իրենց սեփական հայտարարությունների և ծնողական վերահսկողության կարգավորումների վրա։ Սակայն, ինչպես նշվում է հայցում, Roblox-ը թույլ է տվել Իթանին ինքնուրույն անջատել ծնողական վերահսկողությունը, իսկ Discord-ը թույլ է տվել նրան ստեղծել հաշիվ և շփվել մեծահասակների հետ առանց որևէ հսկողության։
Որդու մահից հետո ընտանիքը ոստիկանությունից տեղեկություն է ստացել, որ դեռահասին խաբող տղամարդը ձերբակալվել է Ֆլորիդայում՝ նույն հարթակների միջոցով այլ երեխաների նկատմամբ կատարված նմանատիպ հանցագործությունների համար։
Թարգմանությունը՝ Euromedia24.com-ի
