Ալիևը գովաբանել է Թրամփին

ԱՄՆ նախագահ Դոնալդ Թրամփն իսկապես արժանի է Նոբելյան խաղաղության մրցանակի, հայտարարել է Ադրբեջանի նախագահ Իլհամ Ալիևը «Ալ Արաբիա» հեռուստաալիքին տված հարցազրույցում։

«Մենք [Հայաստանի] հետ միասին նախագահ Թրամփին առաջադրել ենք Նոբելյան խաղաղության մրցանակի», - ասաց Ադրբեջանի նախագահը։

Ալիևը շեշտել է, որ Թրամփը «հրաշք է գործել Աֆրիկայում, Ասիայում և Հարավային Կովկասում»՝ նշելով ԱՄՆ նախագահի բարյացակամությունն ու առատաձեռնությունը. «Եվ սա նրա բնավորությունն է, սա նրա էությունն է։ Նա խաղաղություն է ուզում։ Նա այնքան առատաձեռն էր, որ բոլորին նվերներ էր տալիս... Նա իսկապես մեծ հարգանքի արժանի մարդ է»։

Ալիևը նաև նշել է, որ Թրամփի նկատմամբ իր վերաբերմունքը միշտ դրական է եղել. «Իմ վերաբերմունքը նրա նկատմամբ՝ որպես քաղաքական գործչի միշտ դրական է եղել, նույնիսկ նրա առաջին ժամկետի ընթացքում, չնայած մենք այդ ժամանակ հնարավորություն չունեցանք հանդիպելու։ Եվ հատկապես, երբ նա կորցրեց ընտրվելու հնարավորությունը ընտրակեղծիքների պատճառով», - ասել է Ադրբեջանի նախագահը՝ հավելելով, որ «Թրամփից խլեցին հաղթանակը»։

Ալիևը հավելել է, որ Թրամփը արժանապատվություն է դրսևորել՝ չնայած պաշտոնը կորցնելուն։

«Այնպես որ, այն ժամանակ, երբ նա նախագահ չէր, իրեն շատ արժանապատիվ էր պահում։ Նա մեծ խիզախություն և արժանապատվություն դրսևորեց։ Եվ վերադառնալ Ամերիկա՝ այս բոլոր ճահճային գորտերի հետ, դե, գիտեք, ինչպիսիք են USAID-ը, «Радио Свобода»-ն, կեղծ լուրեր տարածողները, ինչպիսիք են The Washington Post-ը, The New York Times-ը, The Wall Street Journal-ը, Newsweek-ը. նրանք բոլորը դեմ էին նրան։ Նրանք բոլորը դիվայնացնում էին նրան ճիշտ այնպես, ինչպես, օրինակ, դիվայնացնում էին ինձ։ Գուցե ոչ այնքան, բայց նույն կերպ»,- հայտարարել է նա։