Սպիտակ տան պաշտոնական էջը հայտնվել է TikTok սոցիալական ցանցում, հաղորդում է Reuters-ը։ Նրա տեղեկությունների համաձայն՝ @whitehouse հաշիվը բացվել է օգոստոսի 19-ի երեկոյան՝ ԱՄՆ Արևելյան ափի ժամանակով։
Առաջին հրապարակումը 27 վայրկյան տևողությամբ տեսանյութ էր, որը նվիրված էր ԱՄՆ նախագահ Դոնալդ Թրամփի նվաճումներին՝ «Ամերիկա, մենք վերադարձանք։ Ի՞նչ կա, TikTok?» վերտառությամբ, որում ամերիկացի առաջնորդն ասում է հետևյալ արտահայտությունը.
«Ես ամեն օր արթնանում եմ՝ վճռականորեն տրամադրված՝ ամբողջ երկրի մարդկանց համար ավելի լավ կյանք ապահովելու։ Ես ձեր ձայնն եմ»։ Newsweek ամսագրի տվյալներով՝ գրառումը առաջին ժամվա ընթացքում ստացել է ավելի քան 7500 «լայք» և 500 մեկնաբանություն։
Ինչպես պարզել է ՏԱՍՍ-ի թղթակիցը, օգոստոսի 20-ի առավոտյան Սպիտակ տան էջին բաժանորդագրվել էր ավելի քան 63,5 հազար մարդ, իսկ այդ ժամանակ հրապարակված երեք տեսանյութերը հավաքել էին ավելի քան 102,1 հազար «լայք»։ Առաջին տեսանյութը հավաքել էր 44,5 հազար «լայք» և 12,6 հազար մեկնաբանություն։
