Իսպանացի մի կին պատմել է, որ իրեն և իր ընկերոջը մերժել են Պուերտո Ռիկո մեկնող ինքնաթիռ նստել, քանի որ ChatGPT չաթբոտը նրանց սխալ տեղեկատվություն է տվել վիզայի պահանջների վերաբերյալ, գրում է Daily Mail-ը։
Մերի Քալդասը պատմել է, որ ուղևորությանը նախապատրաստվելիս ChatGPT-ին հարցրել է, թե արդյոք իրեն վիզա է պետք Կարիբյան կղզի մուտք գործելու համար։ Նրա խոսքով՝ արհեստական ինտելեկտը բացասական պատասխան է տվել, և ինքը չի ստուգել պաշտոնական աղբյուրներում եղած տվյալները։
Աղջկա զուգընկերը՝ Ալեխանդրո Սիդը, փորձել է հանգստացնել նրան, և Քալդասը ինքը՝ մի փոքր հեգնանքով, ենթադրել է, որ արհեստական ինտելեկտը «վրեժ է լուծում» իրենից նախկին վիրավորանքների համար։
Մեկնաբանները բաժանվել են. ոմանք ծաղրել են զույգին՝ միջազգային ճանապարհորդությունների հարցերում արհեստական ինտելեկտին վստահելու համար, իսկ մյուսները նշել են, որ ChatGPT-ն, հավանաբար, ճիշտ պատասխան է տվել, բայց օգտատերերը սխալ հարց են տվել։
Թարգմանությունը՝ Euromedia24.com-ի
