Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև օգոստոսի 15-ին նախատեսված հանդիպումը տեղի կունենա Ալյասկայի Անքորիջ քաղաքում գտնվող ԱՄՆ ռազմաօդային ուժերի և բանակի Էլմենդորֆ-Ռիչարդսոն համատեղ բազայում, հաղորդում է CNN-ը՝ հղում անելով Սպիտակ տան պաշտոնյաներին։
Հեռուստաալիքի տվյալներով՝ վերջին օրերին ամերիկացի պաշտոնյաները լուրջ խնդրի են բախվել գագաթնաժողովի համար տեղ փնտրելիս։ Պարզվել է, որ Ալյասկայում զբոսաշրջային սեզոնի գագաթնակետի պատճառով գործնականում չկան գագաթնաժողովի համար հասանելի և հարմար վայրեր։
Ջունոյում, Անքորիջում և Ֆեյրբենքսում տարբերակները քննարկելուց հետո կազմակերպիչները եզրակացրել են, որ միայն Անքորիջն ուներ համապատասխան հարմարություններ։
Աղբյուրների փոխանցմամբ՝ Սպիտակ տունը հույս ուներ խուսափել Ռուսաստանի առաջնորդի հետ հանդիպումը ԱՄՆ ռազմական օբյեկտում անցկացնելուց։ Սակայն Էլմենդորֆ-Ռիչարդսոնը միակ վայրն է, որը համապատասխանում է պատմական հանդիպման բոլոր պահանջներին։
