Ատոմային էներգիայի միջազգային գործակալությունը (ԱԷՄԳ) հուսով է ավելի շատ տեղեկություն ստանալ Իրանի միջուկային ծրագրի մասին, ինչպես նաեւ ստանալ իր հարցերի պատասխանները մինչեւ հունիսին կայանալիք կառավարիչների նիստը, «ՌԻԱ Նովոստիի» հարցազրույցում հայտնել է ԱԷՄԳ գլխավոր տնօրեն Ռաֆայել Գրոսին։
«Մի շարք զրույցներ ենք ունեցել Թեհրանում եւ Սպահանում, որտեղ ներկա են եղել տեխնիկական մասնագետներ, որոնք, իմ կարծիքով, անհրաժեշտ են, որպեսզի մենք կարողանանք ավելի շատ տեղեկություն եւ պարզաբանումներ ստանալ Իրանից։ Մենք շարունակում ենք աշխատանքը տեխնիկական մակարդակում, եւ ես հուսով եմ, որ մեզ կհաջողվի հասնել ինչ-որ կոնկրետ արդյունքների։ Հակառակ դեպքում, ինձ թվում է, որ մենք կարող ենք նորից բախվել դժվարությունների, ուստի ես հուսով եմ, որ մեզ կհաջողվի հասնել կոնկրետ արդյունքների մինչեւ ԱԷՄԳ կառավարիչների խորհրդի հաջորդ նստաշրջանը (նախատեսված է ընթացիկ տարվա հունիսի 3-7-ին- խմբ.)»,- ասել է Գրոսին։
Նա նշել է, որ գործակալությունում ակնկալում են ավելի շատ տեղեկություն ստանալ միջուկային ծրագրի մասին, ինչպես նաեւ ստանալ իրենց որոշ հարցերի պատասխանները։
