Կանադայի վարչապետ Մարկ Քարնին հայտարարել է, որ երկիրը կբավարարի ՆԱՏՕ-ի պաշտպանության ծախսերի նվազագույն շեմը՝ ՀՆԱ-ի 2%-ը, արդեն հաջորդ տարվա սկզբին՝ հինգ տարի շուտ նախապես հայտարարվածից։ Միաժամանակ, Կանադան պատրաստվում է պաշտպանական ծախսերի դիվերսիֆիկացման՝ նվազեցնելով կախվածությունը Միացյալ Նահանգներից։ Քարնին ընդգծել է, որ Կանադայի ռազմական ենթակառուցվածքն ու տեխնիկան զգալիորեն հնացել են. միայն մեկ սուզանավ է շահագործելի, իսկ նավատորմի և ցամաքային մեքենաների կեսից քիչն են գործարկվում։ Նա շեշտել է, որ ՆԱՏՕ-ի հաշվապահներին բավարարելու փոխարեն, առաջնայինը Կանադայի անվտանգությունն է։
Քարնին նաև հայտարարել է, որ ՆԱՏՕ-ի գալիք գագաթնաժողովում կքննարկվի ՀՆԱ-ի 5%-ին հասնելու նոր թիրախը, ինչն առաջ է քաշել ԱՄՆ նախագահ Դոնալդ Թրամփը։ Միևնույն ժամանակ, Կանադան նոր ռազմական գնումների ուղղությամբ խորացնում է համագործակցությունը Եվրոպայի հետ, վերանայելով անգամ ԱՄՆ-ից F-35 կործանիչների ձեռքբերման պայմանագիրը։
Վարչապետը քննադատել է ԱՄՆ-ի՝ համաշխարհային առաջատարի դիրքից նահանջելու միտումը և ընդգծել, որ ԱՄՆ-ն սկսել է «մոնետիզացնել իր գերակայությունը»՝ զիջելով համատեղ անվտանգության ոլորտում իր ներդրումների չափը։ Այդ փոփոխության ֆոնին, Կանադան նախատեսում է միլիարդավոր դոլարների ներդրումներ նոր սուզանավերի, ռադարների, անօդաչու սարքերի և Արկտիկայի վերահսկման տեխնիկայի մեջ, փոխանցում է CNN-ը։
