Երուսաղեմի շրջանային դատարանը Իսրայելի վարչապետ Բենիամին Նեթանյահուին ազատել է հաջորդ շաբաթ կոռուպցիայի գործով լսումներին ցուցմունք տալուց՝ վարչապետի Միացյալ Նահանգներ կատարելիք այցի պատճառով, հաղորդում է Ynet-ը։
Հուլիսի 1-ին Նեթանյահուն Իսրայելի կաբինետի նիստի սկզբում հայտարարեց, որ հաջորդ շաբաթ Վաշինգտոնում նախատեսում է հանդիպել ԱՄՆ նախագահ Դոնալդ Թրամփի, փոխնախագահ Ջեյ Դեյ Վենսի, պետքարտուղար Մարկո Ռուբիոյի, պաշտպանության նախարար Փիթ Հեգսեթի և ԱՄՆ նախագահի դեսպանորդ Սթիվեն Ուիթքոֆի հետ։
Հունիսի վերջին Axios-ի թղթակից Բարաք Ռավիդը և Associated Press-ը հայտնեցին, որ Նեթանյահուն առաջիկա օրերին կայցելի Վաշինգտոն և հուլիսի 7-ին Սպիտակ տանը բանակցություններ կվարի Թրամփի հետ։
Ամերիկացի և իսրայելցի առաջնորդների միջև առաջիկա հանդիպման օրակարգը դեռևս մանրամասնորեն չի հրապարակվել։ Այնուամենայնիվ, ենթադրվում է, որ կողմերը հիմնականում կքննարկեն Իրանի և Գազայի հատվածի շուրջ ստեղծված իրավիճակը։
