Երևան քաղաքի պարեկները հունիսի 26-ին՝ կեսգիշերն անց, Նոր Նորքի 2-րդ զանգվածի զբոսայգիներից մեկում հայտնաբերել, թմրամիջոց ձեռք բերելու և իրացնելու կասկածանքով ձերբակալել ու Նոր Նորքի բաժին են տեղափոխել 28-ամյա և 33-ամյա երկու երիտասարդի:
Նրանց անձնական խուզարկությամբ հայտնաբերվել է 7 փաթեթ՝ ընդհանուր 12 գրամից ավելի մարիխուանայի նմանվող զանգվածով: Հետագայում պարզվել է, որ 33 տարեկան տղամարդը Երևանի տարբեր հատվածներում տեղադրելու նպատակով հունիսի 24-ին Տելեգրամով ձեռք է բերել մարիխուանայի 35 փաթեթ, որոնցից մի քանիսը հունիսի 25-ին տեղադրել է, 2 փաթեթ տվել է 28-ամյա երիտասարդին, իսկ 4 փաթեթը Մոլդովական փողոցում կայանված «Տոյոտա» մակնիշի մեքենայում է:
Նախաձեռնված քրեական վարույթի շրջանակում կատարված զննությամբ 33-ամյա երիտասարդի մատնանշած վայրերում հայտնաբերվել է մարիխուանայի զանգվածով 6 փաթեթ:
Հանգամանքները նախաքննությամբ պարզվում են։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
