Հավաքական անվտանգության պայմանագրի կազմակերպության (ՀԱՊԿ) արտաքին գործերի նախարարները խստորեն դատապարտում են Իսրայելի և ԱՄՆ-ի կողմից Իրանի վրա հասցված հարվածները, որոնք սպառնում են անկայունացնել տարածաշրջանը։ Այս մասին ասվում է նախարարների հայտարարության մեջ՝ կապված Մերձավոր Արևելքում ստեղծված իրավիճակի հետ։
«Մենք՝ Հավաքական անվտանգության պայմանագրի կազմակերպության անդամ պետությունների արտաքին գործերի նախարարներս, մեր խորը մտահոգությունն ենք հայտնում Մերձավոր Արևելքում լարվածության վտանգավոր սրման վերաբերյալ։
Մենք խստորեն դատապարտում ենք Իրանի Իսլամական Հանրապետության դեմ ռազմական գործողությունները, որոնք խախտում են Միավորված Ազգերի Կազմակերպության Կանոնադրությունը և միջազգային իրավունքը։ Մենք անկեղծորեն ցավակցում ենք բոլոր տուժածներին և սգում փոխադարձ հարձակումների հետևանքով զոհերի համար։
Մենք ընդգծում ենք, որ քաղաքացիական օբյեկտների, այդ թվում՝ միջուկային էներգիայի ենթակառուցվածքների վրա ցանկացած հարձակում կտրականապես անընդունելի է և միջազգային իրավունքի սկզբունքների և նորմերի կոպիտ խախտում է։
Դրանք ստեղծում են իրավիճակի հետագա անկայունացման ռիսկեր ամբողջ տարածաշրջանում և հղի են համաշխարհային խաղաղության և կայունության համար կործանարար հետևանքներով», - նշվում է փաստաթղթում։
Միաժամանակ, նախարարները շեշտեցին, որ նման գործողությունները «խաթարում են Մերձավոր Արևելքում միջուկային և զանգվածային ոչնչացման այլ զենքերից զերծ գոտի ստեղծելու ջանքերը»։
