ԱՄՆ-ը տարիներ շարունակ դժվարություններ է ունեցել Կանադայի հետ հարաբերություններում, սակայն Վաշինգտոնը զգալի տնտեսական ազդեցություն ունի Օտտավայի վրա, ուրբաթ օրը Սպիտակ տանը լրագրողների հարցերին պատասխանելիս ասել է նախագահ Դոնալդ Թրամփը։
«Կանադան հարկ է սահմանել մեր որոշ ընկերությունների վրա։ Կանադայի հետ գործ ունենալը շատ դժվար է եղել երկար տարիներ։ Գիտեք, մենք լսում ենք Կանադային։ Մենք հիանալի հարաբերություններ ունենք Կանադայի ժողովրդի հետ, բայց դա շատ դժվար է եղել։ Մենք չենք ուզում որևէ վատ բան անել։ Մենք այնքան մեծ իշխանություն ունենք Կանադայի վրա տնտեսապես, որ ես չէի ցանկանա այն օգտագործել։
Բայց այսօր նրանք ինչ-որ բան արեցին մեր տեխնոլոգիական ընկերությունների հետ՝ փորձելով պատճենել Եվրոպային։ Գիտեք, նրանք պատճենում են Եվրոպային», - ասել է պետության ղեկավարը։
«Դա լավ չի լինելու ո՛չ Եվրոպայի, ո՛չ էլ Կանադայի համար։ Նրանք հիմարություն արեցին, ուստի, ես ասացի, որ մենք դադարեցնում ենք բոլոր բանակցությունները Կանադայի հետ հենց հիմա», - հավելել է նախագահը։
Ավելի վաղ Թրամփը հայտարարել էր, որ հրաժարվում է շարունակել երկխոսությունը Կանադայի հետ երկրների միջև առևտրային համաձայնագրի շուրջ։ Նա ընդգծել է, որ իր որոշումը կապված է Օտտավայի՝ ամերիկյան տեխնոլոգիական ընկերությունների վրա թվային հարկ սահմանելու մտադրության հետ։
