Թուրքիան համոզված է, որ Իրանը չի փակի Հորմուզի նեղուցը, որով էներգակիրների զգալի մասը տեղափոխվում է համաշխարհային շուկաներ, հայտարարել է Թուրքիայի նախագահ Ռեջեփ Թայիփ Էրդողանը։
«Հորմուզի նեղուցի փակումը մեծ խնդիր կստեղծի։ Մենք վստահ ենք, որ Իրանը նման քայլի չի դիմի։ Վերջին լարվածությունը ևս մեկ անգամ հիշեցրեց մեզ, թե որքան կարևոր է էներգամատակարարման անվտանգությունը», - Հաագայում ՆԱՏՕ-ի գագաթնաժողովից վերադառնալուց հետո լրագրողներին ասել է Էրդողանը։ Նրա խոսքերը մեջբերել է TRT Haber հեռուստաալիքը։
«Երկու օր առաջ լուրեր տարածվեցին, որ Իրանը «անջատել է Թուրքիայի գազը»։ Ես անմիջապես քննարկեցի այս հարցը իմ էներգետիկայի նախարարի հետ, և նա կապ հաստատեց իր իրանցի գործընկերոջ հետ։ Իրականում նման իրավիճակ չկա։
Մենք նաև զրույց ունեցանք Իրանի նախագահ Մասուդ Փեզեշքիանի հետ։ Մենք նույնիսկ չենք կարծում, որ կարող է ստեղծվել իրավիճակ, որի դեպքում Իրանից բնական գազի մատակարարումները կդադարեցվեն։ Մենք որևէ խնդիր չունենք», - ասել է Թուրքիայի առաջնորդը։
Էրդողանի խոսքով՝ Թուրքիան ձգտում է կրճատել էներգակիրների ներմուծումը և ավելացնել արտադրությունը՝ էներգետիկայի ոլորտում լիովին անկախ դառնալու համար։
