Հաագայում ՆԱՏՕ-ի գագաթնաժողովի հիմնական նպատակը Միացյալ Նահանգներին դաշինքում պահելն ու Ուկրաինային ռազմական օգնություն ցուցաբերելը։ Ինչպես իր հոդվածում նշում է Bloomberg-ի սյունակագիր Մաքս Հասթինգսը, եվրոպացի առաջնորդները ստիպված էին հավատարմություն ցուցաբերել և գովաբանել ԱՄՆ նախագահ Դոնալդ Թրամփին՝ նրա զայրույթից և ՆԱՏՕ-ից դուրս գալու նոր սպառնալիքներից խուսափելու համար։
«Հաագայի գագաթնաժողովը չէր ձևացնում, թե քննարկում է գլոբալ ռազմավարությունը։ Այն, պարզապես, ցույց տվեց ՆԱՏՕ-ի եվրոպական անդամների հուսահատ ջանքերը՝ ավելացնելու պաշտպանական ծախսերը։ Գագաթնաժողովը շոյեց Միացյալ Նահանգներից եկած պատվավոր հյուրին այնպիսի ձևով, որը նույնիսկ Սառը պատերազմի ժամանակ աննախադեպ էր», - գրում է նա։
Նա ասել է, որ արևմտյան առաջնորդները «ստիպված էին խոնարհվել, սիրաշահել, համաձայնվել, երբ շատերը անձնականում համաձայն չեն»։ «Երեկ ոչ ոք, բացի գլխավոր հյուրից, չհավատաց նրա այն պնդմանը, որ ամերիկյան և իսրայելական ռումբերը Իրանը «տասնամյակներով» հետ են մղել։ Սակայն նրանք լռեցին և կշարունակեն լռել, որպեսզի չառաջացնեն նրա զայրույթը», - ասաց Հասթինգսը։
Դիտորդը նշում է, որ Ուկրաինայի հարցում «եվրոպացիները չեն կարող Զելենսկուն տալ այն, ինչ նա ստանում է ԱՄՆ-ից»։ ՆԱՏՕ-ի յուրաքանչյուր անդամ, շարունակում է նա, Հաագայում ընդունել է, որ «միայն իրենց ենթակայությունը և Զելենսկու ենթակայությունը կարող են աջակցել» Ուկրաինային։
