Ուժային, իրավապահ մարմիններում պարտադիր թմրաթեստ հանձնելու վերաբերյալ փաթեթի քվեարկությունը հետաձգվել է 2 ամսով

ՀՀ ԱԺ «Հայաստան» խմբակցության պատգամավոր Ագնեսա Խամոյանն առաջարկում է բացառել ուժային, իրավապահ մարմիններում թմրանյութերի օգտագործումը: Նրա խոսքով՝ ոստիկանը, քննիչը, ԱԱԾ աշխատակիցը, ՊՊԾ ծառայողը, փրկարարը չեն կարող օգտագործել թմրանյութ, իսկ օգտագործելու դեպքում առաջարկվում է կարգապահական ամենախիստ պատիժը սահմանել, աշխատանքից ազատել: Աշխատանքից ազատում է նախատեսվում նաև թմրանյութի թեստը հանձնելուց հրաժարվելու պարագայում:

«ՀՀ քննչական կոմիտեի մասին» և կից օրենքներում լրացումներ ու փոփոխություններ նախատեսող օրենսդրական փաթեթն ԱԺ պետական-իրավական հարցերի մշտական հանձնաժողովի նիստում քննարկվել է առաջին ընթերցմամբ:

ԱԺ մամուլի ծառայության փոխանցմամբ՝ փաթեթով վերոնշյալ աշխատակիցները պատահականության սկզբունքով թմրաթեստ կհանձնեն տարեկան երկու անգամ: Ըստ հեղինակի՝ տարբեր թմրանյութեր տարբեր ժամանակահատվածում են պահպանվում օրգանիզմում, և պատահականության սկզբունքով հանձնումն անձին հնարավորություն չի տա ժամկետն իմանալ և դրանից առաջ բացառել թմրանյութի օգտագործումը: Դա նաև համապատասխան մարմիններին ճշգրիտ բաշխում իրականացնելու հնարավորություն կտա, այսինքն՝ թեստավորում իրականացնող լաբորատորիաները ծանրաբեռնված չեն լինի:

Չժխտելով նախագծի գաղափարի կարևորությունը՝ հանձնաժողովի նախագահ Վլադիմիր Վարդանյանը խոսել է թմրանյութերի դեմ պայքարի մեթոդների և ձևերի մասին: «Մենք այս համակարգի միջոցով ո՞ւմ ենք հայտնաբերում. հայտնաբերում ենք կախվածություն ունեցող անձանց, մենք չենք հայտնաբերում շղթան, չենք գտնում առաքողին, պատրաստողին, ներմուծողին: Մենք գալիս ենք հետևանքից, ոչ թե պայքարում ենք պատճառի դեմ»,- նման կարծիք է հայտնել պատգամավորն ու կարևորել ամբողջական փաթեթի ներկայացումը:

Ագնեսա Խամոյանը վստահեցրել է, որ սա թմրանյութերի դեմ պայքարին վերաբերող իր վերջին նախագիծը չի լինելու: Նրա համոզմամբ՝ իրավապահ, նախաքննական մարմնի որևէ աշխատակից չի կարող թմրանյութ օգտագործել:

Հարակից զեկույցում հանձնաժողովի անդամ Լիլիթ Մինասյանը ևս կարևորել է գաղափարը, նշել, որ խնդրահարույց կետեր կան իրավական որոշակիության հետ կապված: Լիլիթ Մինասյանն առաջարկել է գործադիրի ներկայացուցիչների հետ քննարկումներ անցկացնել՝ հասկանալու, թե իրավապահ համակարգից որ մարմիններն են առավել առնչվում թմրանյութերի դեմ պայքարի գործառույթին, ինչ պատժամիջոցներ կարող են կիրառվել և արդյոք աշխատանքից հեռացումն իրավաչափ է, քննարկել թեստերի հանձնման պարբերականության, թեստերի քանակի ու հնարավորությունների, լաբորատորիաների ծավալի հարցը: Ըստ պատգամավորի՝ դա առավել հստակ և արդյունքային նախագիծ ունենալու հնարավորություն կտա:

ՀՀ արդարադատության նախարարի պարտականությունները կատարող Արմենուհի Հարությունյանը ներկայացրել է օրենսդրությամբ թմրանյութերի դեմ պայքարում արդեն նախատեսված կառուցակարգերը: Նշվել է, որ այս պահին Կառավարության համար ընդունելի չէ առաջարկվող կարգավորումը: «Եթե հնարավոր կլինի գաղափարի շուրջ պատգամավորների հետ ձևավորել այլ նախագիծ, կարծում եմ` Կառավարությունն այլ նախագծի դեմ չի լինի, քանի որ ի սկզբանե գաղափարին դեմ չի եղել»,- նշել է գործադիրի ներկայացուցիչը:

Պատգամավորները, կարևորելով նախաձեռնությամբ առաջարկվող գաղափարը, խոսել են իրավական որոշակիության խնդիրների մասին: Նրանք միակարծիք են եղել, որ թմրանյութերի օգտագործման ու տարածման նկատմամբ չպետք է լինի որևէ հանդուրժողականություն:

Վլադիմիր Վարդանյանի խոսքով պետք է հստակեցնել այն սուբյեկտների կազմը, որի նկատմամբ պետք է կիրառվեն նշված կանոնակարգումները: Պետք է հստակեցվի նաև այն պարբերականությունը, որի շրջանակում կիրականացվեն տվյալ փորձաքննությունները: «Պետք է հասկանալ՝ ինչ կարգապահական պատասխանատվության միջոցներ պետք է նախատեսվեն»,- նշել է պատգամավորն ու այս համատեքստում խոսել նաև ընտրովի մեթոդաբանության հարցի շուրջ:

Կարևորվել է առաջիկայում հարցի առնչությամբ մասնագիտական քննարկումների անցկացումը:

Արձանագրվել է, որ նախագծի լրամշակման նպատակով աշխատանքային խումբ է ստեղծվում:

Հեղինակն օրենսդրական փաթեթը լրամշակելու և առաջարկները քննարկելու պատրաստակամություն է հայտնել:

Քննարկումների արդյունքում օրենսդրական փաթեթի քվեարկությունը հետաձգվել է մինչև երկու ամիս ժամկետով: