Հունիսի 18-20-ը ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի նախաձեռնությամբ Դիլիջանում անցկացվում է հայ-վրացական փորձագիտական երկրորդ համաժողովը, որը միտված է խորացնել երկու երկրների ռազմավարական համագործակցությունը։
Այսօր Տավուշի մարզպետի տեղակալ Նարեկ Ղուշչյանը մարզպետի աշխատակազմում դիմավորել է «Հայաստան-Վրաստան ռազմավարական գործընկերություն. դեպի համագործակցության նոր հորիզոններ» խորագրով համաժողովի մասնակիցներին։
Մարզպետի աշխատակազմում կայացած ճեպազրույցին մասնակցել են Տավուշի մարզպետի աշխատակազմի, ՀՀ սահմանապահ ծառայության և ԵՄ դիտորդական առաքելության (EUMA) ներկայացուցիչները։ Ներկա էին նաև վրացական պետական, մասնավոր և հայալեզու հինգ լրատվամիջոցների ներկայացուցիչներ, ինչպես նաև 12 փորձագետներ։
Համաժողովի նպատակն է Վրաստանի առաջատար վերլուծաբաններին ու լրատվամիջոցներին ներկայացնել Հայաստանի կառավարության արտաքին, անվտանգային և տնտեսական քաղաքականության առաջնահերթությունները, Տավուշի մարզում իրականացված սահմանազատման գործընթացը և մարզի ենթակառուցվածքները, ինչպես նաև խթանել հայ-վրացական հարաբերությունների զարգացումը։
