Լատվիայի իշխանությունների կողմից Ռիգայում բռնագրավված «Մոսկվայի տուն» շենքը կրկին աճուրդի է հանվել։ Այս մասին հաղորդում է Delfi պորտալը։
Հաջորդ աճուրդը կսկսվի հունիսի 13-ին և կտևի մինչև հուլիսի 14-ը։ Վաճառքի է հանվել Մարիխաս փողոցում գտնվող 966 քառակուսի մետր մակերեսով հողամաս՝ շենքի հետ միասին։ Մեկնարկային գինը մնում է նույնը՝ 2.14 միլիոն եվրո։ Սա արդեն չորրորդ փորձն է գույքը այս գնով վաճառելու։
Ընդհանուր առմամբ, «Մոսկվայի տունը» վաճառելու վեց անհաջող փորձ է եղել։ Սկզբնապես այն գնահատվել է 3.57 միլիոն եվրո, սակայն գնորդների հետաքրքրությունը ցածր է եղել։
«Մոսկվայի տուն» մշակութային կենտրոնը Ռիգայում բացվել է 2004 թվականին։ Գաղափարը պատկանում էր Մոսկվայի այն ժամանակվա քաղաքապետ Յուրի Լուժկովին։
2024 թվականի հունվարին Լատվիայի Սեյմը որոշեց շենքը փոխանցել պետությանը և վաճառքից ստացված գումարը ուղարկել Ուկրաինային։ Սակայն Ռուսաստանի արտաքին գործերի նախարարությունը հայտարարեց, որ Մոսկվայի համաձայնության բացակայության դեպքում վաճառքը կարող է իրավական հետևանքներ ունենալ Լատվիայի և մրցույթի մասնակիցների համար։
Ավելի ուշ Ռուսաստանը հայց ներկայացրեց Մարդու իրավունքների եվրոպական դատարան (ՄԻԵԴ)՝ ի պատասխան Լատվիայի Սահմանադրական դատարանի որոշումների, որը երկու անգամ մերժել էր Ռիգայում Մոսկվայի տան բռնագրավման անօրինականության վերաբերյալ բողոքները։
