Իրանը խափանել է «Զանգեզուրի միջանցք» ստեղծելու փորձը, հայտարարել է Իրանի Իսլամական Հանրապետության գերագույն առաջնորդի միջազգային հարցերով խորհրդական Ալի Աքբար Վելայաթին, հաղորդում է Tasnim-ը։
Նրա խոսքով՝ Իրանը երբեք այսքան հզոր, անկախ և ազդեցիկ չի եղել, որքան այսօր է։ Այս հզորության հստակ նշաններից մեկը Իրանի արագ և վճռական արձագանքն էր Հարավային Կովկասի տարածաշրջանում ստեղծված ճգնաժամին։
«Երբ որոշ երկրներ փորձեցին Նախիջևանը կապել Ադրբեջանի հետ Հայաստանի տարածքով՝ «Զանգեզուրի միջանցք» ստեղծելու պատրվակով, որը, ըստ էության, կնշանակեր մասնատում և դեպի Եվրոպա իրանական միջանցքի փակում, Իրանի Իսլամական Հանրապետությունը վճռականորեն դեմ արտահայտվեց այս ծրագրին և խափանեց դրա իրականացումը», - ասել է Վելայաթին։
Վելայաթին ընդգծել է, որ «Զանգեզուրի միջանցքի» վերջնական նպատակը ոչ միայն Իրանին հյուսիսային ուղղությունից կտրելն էր, այլև Ռուսաստանի շուրջը օղակը հարավից շրջապատելն ու փակելը։ Սակայն այս նախագիծը նույնպես ձախողվեց։
